РФ-дин эцигунрин ва ЖКХ-дин министр Ирек Файзуллина и йикъара РД-дин Гьукуматдин Председатель Мегьамед Рамазановахъ галаз гуьруьш кьиле тухвана. Абуру Кеферпатан Кавказда тIебиатдин завал себеб яз кардикай хкатай транспортдин, коммунальный инфраструктура, яшайишдин кIвалер цIийикIа туькIуьр хъувунин месэлаяр веревирдна. Дагъустанда арадал атанвай гьалар винидихъ тIвар кьунвай министерстводин кьетIен гуьзчивилик ква.
И. Файзуллинни М. Рамазанов гьакIни цик акатунин нетижада михьиз чкIанвай кIвалерин иесияр цIийибуралди таъминаруникайни рахана. Мад сеферда яд акьалтунин хаталувал авай чкада цIийи кьилелай кIвалер эхцигдач. Виликдай ахьтин чкада кIвалер авайбур патал гила цIийи мулкар чара авунва.
Дагъустанда гьалар гуьнгуьна хтунин кIвалахар РФ-дин эцигунрин ва ЖКХ-дин министерстводи милли «Инфраструктура для жизни» проектдин куьмекдалди кьилиз акъудзава.
«Лезги газет»
