Кесер хкажуниз талукь я
Кадетвилин образованидин хиле государстводин политикадин бинеяр тестикьарзавай Президент Владимир Путинан цӀийи указди Дагъустанда и хел вилик тухуниз рум гана, – хабар гузва РД-дин образованидин ва илимдин министерстводин пресс-къуллугъди.
ЦӀийи указ жегьилар ватанпересвилин гьиссераллаз тербияламишуниз, абур руьгьдинни ахлакьдин ивиррал мягькемаруниз, гьакIни государстводин ва военный къуллугъдин кесер хкажуниз талукь я.
Дагъустанда кадетрин образование вилик тухунин рекьяй вири патарихъай фикирда кьуна тешкилнавай кӀвалах кьиле физва. Къенин юкъуз республикада кадетрин кьве корпус, кадетрин гьуьлуьн са школа-интернат ва умуми образованидин идарайрин бинедаллаз кадетвилин 4 класс кардик ква. Санлай къачурла, кадетвилин рекьяй чирвилер 1000-далай гзаф аялри къачузва.
Государстводин сиясатдин цIийи бинейри кадетрин образование тешкилунин са жуьредин къайдаяр арадал гъун, и рекьяй алатринни техникадин диб вилик тухун, педагогрин чирвилер хкажун, кадетрин классар ва мектебар гегьеншаруналди, тIем акакьдайбур авун (гьа гьисабдай яз, яшайишдин рекьяй куьмек герек тир аялар патал) фикирда кьунва.
Дагъустандин образованидин ва илимдин министерстводи кадетвилин ва казакрин кадетрин программаяр кьилиз акъудзавай образованидин идараяр вахт-вахтунда ахтармишзава. Ида лагьайтIа, кӀелзавайбур гьазурунин ва абуруз тербия гунин къайда датӀана хъсанардай мумкинвал гузва.
Чи мухбир