Августдин и йикъара бине Ахцегь райодин Хуьруьгай тир, Покачи шегьерда яшамиш жезвай чи хизандин дуст Юсуфанни Замирадин патай чаз мехъерик иштирак авунин теклиф атана. Саки кьуд йисуз СВО-да иштиракзавай абурун хва Къурбаназ свас гъизвай. Мехъерилай гуьгъуьниз заз цIийиз хизан кутунвай Къурбанахъ галаз ихтилатар ийидай мумкинвал хьана.

Ширинбегов Къурбан Юсуфович­ 2000-йисан октябрдин вацра Хуьруьгрин хуьре дидедиз хьана. Адан вад йис тамам хьайила, ХМАО-Юградин Покачи ше­гьердиз кIвалахиз фенвай дахди хизан вичин патав хутахна. Ина 9-класс акьал­тIарнамазди, Къурбан Лангепасдин политехколледждик экечIна, автомеханиквилин пешедай кIелна.

2019-йисуз Россиядин армиядин жергейриз эверай адаз Дальний Востокдин Уссурийск шегьерда мотострелковый бри­гадада къуллугъ авун кьисмет хьана­. Автомеханик тир адаз са йисан къене яракьар алай гьар жуьредин военный машинар гьалдай хъсан тежриба хьана. Къуллугъдин эхирдай адакай реактивный залповый система «Град» яракьрай ацIурдай улакь гьалдай устIар хьана.

Са тIимил вахтунда ял яна, Къурбан Покачидин нафтни газ хкудзавай технологический транспортдин компанияда махсус техникадин улакьдин водителвиле кIвалахал акъвазна. 

СВО-див гатIунай ругуд вацралай уьл­кведин Президентди мобилизациядин гьа­къиндай малумарна. Са акьван вахт фенач, сентябрдин вацра кIвалахзавай организациядиз военкоматдин векилар атана, адан гъиле СВО-диз эвер гузвай повестка туна.

– Вун армиядай хтана, са йисни тахьанмаз, ваз СВО-да иштиракиз эверзавай повестка атайла, дахди, дидеди вуч лагьана? – хабар кьуна за.

– Вуч лугьуда кьван, заз аниз фидай ният авайди чир хьайила, абуру заз «чан хва, вун сагъ-саламат, Аллагьдал аманат хьуй!» лагьана. ГьакI лагьанатIани, за абурун рикIе авай къалабулух гьиссзавай.

Къурбанан гафарай малум хьайивал­, Покачида ам хьтинбурун саки са полк кIватI­навай. Инай абур поездда аваз Екатеринбургдиз тухвана. Ана кIватI хьанвайбур кьве гьафтеда махсус серенжемдиз гьа­зурна. Ахпа абур Свердловскдин областда авай «Яланский» тIвар алай учебный центрдиз ракъурна. Ина пуд вацра СВО-да иштиракна тежриба авай офицерри абурухъ галаз женгерин шартIара герек къведай вири рекьерай (хер-кьацI хьайидаз сифте куьмек гунин, тактикадин, яракьар ишлемишунин, инженерный хиляй, сапервилин кIвалахдай ва масабурай) тарсар тухвана.

2022-йисан декабрдин эхирра Ширинбегов авай полк ЛНР-дихъ ракъурна. Ина полкунин пуд батальондиз гьардаз вичин чкаяр тайинарна. Къурбан авай батальон Макеевкадихъ юзана. Анай ДНР-да женгерин гьерекатар кьиле физвай чкайривай яргъа авай  Пантелеймоновка поселокдиз рекье туна. Са вацран къене цIийиз атанвайбурухъ галаз инани женгерин шартIара чеб тухудай къайдайрай военный инструкторри жуьреба-жуьре тарсар тухвана.

Къурбана вичиз таъсир авур ва виридалайни рикIел аламай сад лагьай женг икI рикIел хкизва: «А вахтунда, гила хьиз, дронар, йифен камераяр авайди тушир. Чун дяведин майданда къалурнавай чкадал йифиз экъечIна. Чи колонна сифте машинра аваз, ахпа яхдиз 5-6 км фена. Гьарда вичиз командирди къалурай чкаяр кьуна. Чавай са 100 метр яргъа хьиз миллетчияр акъвазнавай. Абурун разведкадиз чун атанвайдакай, гьикI ятIани, хабар хьана. Чун галай патаз абуру гуьлле гуз гатIунна. Чна абуруз кьве сеферда гужлуз жаваб хгана. Пуд сятина, гуьлле гуз, женг давам хьана. Абурун мурад чна кьунвай позициядилай чун катарун тир. Чи батальон са камни кьулухъ юзанач. Аллагьдиз шукур, и женгина чи патай садни телеф хьанач. ЦIуд йикъа­лай чун далу патаз ахкъудна, чи чкадал чун эвеззавай маса батальон атана».

Гьужумдай дестедик кваз Къурбана миллетчийрин са шумуд даяхдин пункт кукIварна, чи аскерриз виликди фидай рехъ ачухна. Нубатдин сеферда Къурбан квай гьужумдин десте миллетчийрин­ сенгеррин лап мукьув фена, абурувай даяхдин са пункт вахчуна. Ахпа къвалав гвай ичIи са блиндажда кIеви хьана. МичIи йиф. Гадайри мукъаятдиз кьуд патахъай къвезвай ванериз яб гузва. Са арада, патавай хьиз, са шей юзадай ван къвезва. Са цIуд секундни алат тавунмаз, «хлопцы­, у вас воды нема?» лугьуз миллетчи атана. И арада дестедин командирди вичихъ галайбуруз кис лагьана, команда гана, чеб вужар ятIа чирвал тагана, хохолрин жуьреда «есть, заходи» лагьана жаваб гана. Ам къенез гьахьнамазди, адал автомат туькIуьрна, гъилер хкаж лагьана. Гьа икI Къурбан квай дестеди миллетчи есирвиле кьуна, душмандин нубатдин опорникни кукIварна.

2025-йисан апрелдиз миллетчийривай­ вахчунвай сенгер мягькемдиз хуьнин тапшуругъ тамамарун патал Къурбан квай десте йифиз тамай тIуз виликди физвай­. Вилик квайди алатайвалди, Къурбана адан гуьгъуьниз кам вегьейла, са шей хъит­кьинна. Вуч хьанватIа, кьил акъат тавуна, вири виликди катна. Са 30 метрдилай Къурбан ацукь хьана. КилигайтIа, хъит­­кьинай шей Къурбанан эрчIи кIвачихъ галукьнавай. Галай юлдашри адаз сифте куьмек гана, иви акъвазарна. Рациядай командованидиз хьайи кардикай хабар гана, ам далу патаз хутахна.

Госпиталда духтурри кIвачI операция авуна, ракьун кIус хкудна. Варзни зура ам госпиталда хьана, ахпа са вацра - реабилитациядин центрада.

Сагъ хъхьанмазди, ам мад вичи къул­лугъзавай частуниз хъфена. Гила­ ада СПВИ дронрин женгинин расчетдал кIва­лахзава, сапер яз, миллетчийрал ахъай­завай дронрал хъиткьиндай шейэр эцигиз, вилик квай позицийрал алай чи ас­керриз недай-хъвадай, алукIдай ва маса шейэр кутуна, гьазуриз кIватIзава.

Хатасузвал хуьзвай махсус серенжемра ва женгера къалурай викIегьви­лерай Къурбан Ширинбегов «За воинскую доб­лесть 2-степени», «За отвагу»,  полкунин па­тай «Доблесть, честь, отвага», «Югра» батальондин патай «Окопный крест 2 степени», «Женгерин гьерекатрин ветеран» ва «Дяведин махсус серенжемдин ветеран» медалриз лайихлу хьанва.

Чна квез, кьилел ислягь цав алаз, цIийиз арадал атанвай хизан бахтлу хьун, ри­­кIевай мурадрив агакьун ва, гъалиб­вал­ къазанмишна, сагъ-сала­мат­диз хтун ­ал­хиш­­зава, гьуьрметлу Къурбан Ширин­­бегов­.­                             

Къагьриман Ибрагьимов