1 ва 2-апрелдиз Къазахстандин Петропавловск шегьерда 21-йисал къведалди яшара авай жегьилрин арада азаддаказ кьуршахар кьунай уьлкведин кIвенкIвечивал патал акъажунар кьиле фена.
Ана чи ватанэгьли, тренерар тир Роман Агьмедханован ва Мегьамед Куругълиеван (спортсмендин буба я) гъилик устадвал хкажзавай Камил Куругълиева 92 кг-дин заланвал авайбурун арада вири 5 бягьсни вахт амаз ва инанмишвилелди, санлай къачурла, 53:2 гьисабдалди акьалтIарна, къизилдин медаль къазанмишна.
РикIел хкин: К.Куругълиев алатай йисузни Къазахстандин кIвенкIвечивилин тIварцIиз лайихлу хьанай. ЦIи финалда адаз Алматы шегьердай тир, алатай йисан уьлкведин чемпионатдин буьруьнждин призёр Самир Дурсунов 13:2 гьисабдалди кумукьна.
Рагнеда Рамалданова
