МРОТ ва регионда яшамиш хьун патал пулунин агъа кIанин кьадар хкаж хьунихъ галаз сад хьиз, аялрин сад тир пособидин ва кIвачел залан тир дишегьлийриз гузвай пулунин кьадарни дегиш хьанва. Амма цIинин йисалай вуч гьисаба кьадачтIа, Яшайишдин фондунин Дагъустанда авай отделенидин агъадихъ галай малуматда хабар гузва.

ИкI, 2026-йисан 1-январдилай 17 йисал къведалди яшара авай аялар патал сад тир пособидин кьадарди тешкилзава: 8 358, 12 537 ва 16 717 манат. Им 2026-йис патал Дагъустанда яшамиш хьун патал тайинарнавай пулунин агъа кIанин кьадардин (вичелай, са кьадар масабурухъ галаз сад хьиз, аялрин сад тир пособидин кьадарни аслу тир) 50 , 75  ва 100 процентдиз барабар я. Виликан йисара хьиз, аялдин сад тир пособидин кьадар (яни, 50 %, 75 % ва 100 %) хизандин дуллухдилай аслу я. Ам гьикьван тIимил хьайитIа, аялдин пособидин кьадар гьакьван гзаф жезва.

КIвачел залан тир дишегьлийриз пособие агъадихъ галай кьадарда гуда: 9 392, 14 089 ва 18 785 манат. И рекъемар реги­онда зегьмет чIугуниз къабил бажарагъ авай чIехи инсанриз яшамиш хьун патал тайинарнавай агъа кIанин кьадардин пулунин 50, 75  ва 100 процентдиз барабар я. Аялрин сад тир пособие хьиз, амни хизандин доходдилай аслу я.

ИкI, алай йисалай хизандин доходдик­ работодателри кIва­лахзавай дишегьлиди­ аял хайила ва я хвавиле-рушвиле кьа­бу­лайла, са сеферда гудай, гьакIни кIва­ликай ва эменнидикай магьрум хьуникди гьар вацра гузвай пулдин куьмек гьисаба кьадач. Виликдай хизандин зегьмет чIугуниз къабил ксарин доход 4 МРОТ-дилай тIимил хьана кIанзавачир. Гила амни дегиш хьанва.

— Алай йисалай, аялрин сад тир пособие тайинардайла, дегиш хьанвай кьилин шартIарикай сад хизандин зегьмет чIугуниз къабил ксарин доходдихъ галаз алакъалу я. Гила, ам тайинардайла, гьисаба кьазвай вахтунда хизандин юкьван гьисабдин доход 8 МРОТ-дилай, яни 216 744 манатдилай тIимил хьана кIанзавач. Им хизандин игьтияждиз къимет гун патал лазим шартI я. Арза рекье твадайла, чна агьалийриз и шартIунив дикъетдивди эге­чIуниз эвер гузва, — къейдзава Алжанат Загьидовади.

Къейд авун лазим я хьи, хизандин доходдик, мажибдилай гъейри, карчивилел ва я маса кIвалахдал машгъул хьуналди къвезвай къазанжи, гьакI вахтуналди зегьмет чIугваз тахьунихъ галаз алакъалу тир пособини акатзава. И жигьетдай гегьенш малуматдихъ галаз Яшайишдин фондунин сайтда таниш жедай мумкинвал ава.

Идалайни гъейри, аялдин йисни зур тамам жедалди адахъ гелкъуьнай гузвай пулунин кьадарни артух хьанва. ИкI, адан вини кьилин кьадарди 83 021, 18 манат тешкилда. КIвачел залан хьунай ва аял хунай гузвай пулунин вини кьилин кьадарди – 955 836 манат. И пуларин тайин кьадар дишегьлидин мажибдилай аслу я. Къенин юкъуз Дагъустанда сад тир пособие 650 агъзурдалай виниз аялрин диде-бубайри къачузва, 70 агъзурдалай виниз дишегьлийри — кIвачел залан тирвиляй.

Рагнеда Рамалданова