18-апрелдиз «Лезги газетдин» редакцияди, мергьяматлувилин «ЛЕКИ» фондуни ва ФЛНКА-ди СтIал Сулейманан райондин Эминхуьре лезги чIалайни эдебиятдай ирид лагьай сеферда чIехи олимпиада кьиле тухуда. Гьар йисуз тешкилзавай чирвилерин акъажунра, алатай йисара хьиз, цIини Кьиблепатан Дагъустандин мектебрин 10-классра кIелзавайбуру иштиракда (гьар са мектебдай – 1 аялди).
Олимпиададин нетижаяр жюридин векилри гьа юкъуз кьада ва тафаватлу хьайи ученикризни абурун муаллимриз пулдин пишкешар, дипломар, ктабар гуда. Кьилди къачуртIа, ученикар патал тешкилатчийри цIи пишкешдин 15 чка тайинарнава: 1-чкадай — 30 агъзур манат, 2-чкадай – 25, 3-чкадай – 20, 4-чкадай – 18, 5-чкадай – 16, 6-чкадай – 14, 7-чкадай – 12, 8-чкадай – 10, 9-чкадай – 8, 10-чкадай – 6, 11-15-чкайрай – гьардаз — 5 агъзур манат.
Олимпиада сятдин 10-даз гатIунда. Сятдин 9-далай иштиракчияр регистрация ийида.
Мектебда вири иштиракчияр патал нисинин тIуьн тешкилда.
«Лезги газет»
