7-июлдиз Дагъустан Республикадин премьер-министр Мегьамед Рамазанова Иранда РФ-дин алишверишдин векилханада РД-дин векил Андрей Танаевахъ галаз гуьруьш кьиле тухвана. Идакай «Лезги газетдиз» саласадиз РД-дин Гьукуматдин пресс-къуллугъди хабар гана.
Гуьруьшдин вахтунда абуру республикайрин арада санал кIвалахунин нетижаяр веревирдна ва гележегда и рекьяй кар алай хилер тайинарна, гьа жергедай яз хуьруьн майишатдиз, промышленностдиз, спортдиз, медениятдиз, гьакIни гуманитарный куьмекар гуниз талукь кIвалахар. Республикайрин арада автомобилар санай масаниз гьал хъувунал машгъул дагъустанвийрин кIвалахдиз талукь ихтилатни кватна.
Медениятдин рекьяй саналди серенжемар кьилиз акъудунин месэлани важиблубурукай яз къейдна. Ирандин Решт шегьерда авай РФ-дин генеральный консульствода Дагъустандин изобразительный искусствойрин музейдин картинайрин выставка тешкилдайвал я, Гилян вилаятда лагьайтIа, – шикилрин выставка. Ибурулай гъейри, Дагъустандин музейрин картинайрин выставка Палестинада тешкилун фикирдик ква.
Спортдин рекьяй авур рахунрай малум хьайивал, алай йисуз Махачкъалада азаддаказ кьуршахар кьунай вири халкьарин иштираквал аваз кьиле фидай акъажунрал Ирандин пагьливанарни желб авун кьетIнава.
С. Салимов
