1-сентябрдиз Махачкъалада, 28-нумрадин гимназиядин гьаятда, Россиядин Игит, Ватандин ЧIехи дяведа фашистрин винел ЧIехи Гъалибвал къачурла, Берлинда рейхстагдал Гъалибвилин тIаратI хкажайбурукай сад тир Абдулгьаким Исмаилован къамат эбеди авун патал хкажнавай гуьмбет ачухна.

И мярекатда РД-дин Кьил Сергей Меликова, РФ-дин Госдумадин депутатри — Султан Хамзаевани Нурбаганд Нурбагандова, Игитдин хтул, СВО-дин иштиракчи Айдемир Исмаилова ва масабуру иштиракна. Душмандихъ галаз кьиле фейи женгера къалурай викIегьвилерай кьегьал дагъустанви Ватандин ЧIехи дяведин I дережадин, Баркаллувилин III дережадин, Яру Пайдах орденриз, «Дирибашвиляй», «Варшава азад авунай», «Берлин къачунай» медалриз лайихлу хьана.

«Абдулгьаким Исмаилован тIварцIи Гъалибвилин тарихда лайихлу чка кьазва. Адаз вич лайихлу хьайи шабагьрикай рахаз кIандачир, гьикI лагьайтIа, ада женгера орденарни медалар патал ваъ, Гъалибвал къачун патал иштиракна», — къейдна С. Меликова, гуьмбет ачухдайла.

«Лезги газет»