Россиядин Игит Хантемир Султанов ва адан бубани диде Дербент райондин администрациядин къуллугъчийрини агьалийри хуш гьалара кьабулна. Администрациядин залда кьиле фейи гуьруьшдал муниципалитетдин кьил Эльман Аллагьвердиева лагьана:
«Игитвилин Гъед Ватан кIан хьунин, офицердин жуьрэтлувилин, аскервилин буржидиз вафалувилин лишан я. Гьуьлуьн пияда кьушунрин 40 лагьай бригададин гьужумдай дестедин командир Хантемир Султанов чун патал чешнени дамах я. Вилик эцигзавай тапшуругъар кьилиз акъуддайла ва юлдашар кьиникьикай къутармишдайла, ада са шумуд сеферда жуьрэтлувал къалурна. 2023-йисуз офицердал залан хирер хьана. Адаз, отставкадиз фена, ислягь зегьметдив эгечIдай мумкинвал авай. Амма Ватандиз вафалу офицер, хирер сагъ хъхьанмазди, вичин юлдашрин патав хъфена. Адан регьбервилик кваз чи аскерри Кьиблепатан Донецкдин терефда авай хейлин хуьрер азад авуник чпин пай кутуна».
Муниципалитетдин кьили Ватандиз намуслувилелди къуллугъзавай Хантемир, Айдемир ва Батырхан хьтин дирибаш рухвайриз тербия ганвай Россиядин Игитдин буба Заман Абдулаевичаз, диде Хунчиназ Ибрагьимовнадиз рикIин сидкьидай сагърай лагьана.
Эльман Аллагьвердиева Хантемир Султановав «Дербент райондин гьуьрметлу агьали» лагьай тIвар ганвайвилин шагьадатнама ва багьа пишкеш вахкана.
«Лезги газет»
