Баян галай шикил

Халисан футбол вилеризни такур хуьруьн аялар яз, а къугъунал чи рикI гзаф алай. Ахьтин вахтар жедай хьи, диде-бубади жуван хиве тунвай везифаярни фикирдай акъатна, са шумуд сятина тупунин гуьгъуьна звердай. Лугьун хьи, тупунал алайдини гьа са тIвар тир. Адан къене гар авай камера хьайи югъ чна сувар яз кьазвай. Амай чIавуз ам я нагъварай, я пекерай ацIурна къугъвадай. МичIи жез-тежез, аман кумачиз, кIвализ акъат хъувурла, ара гуз, лапIашарни акьадай. Иллаки — къазар, лапагар вири хтун тавур дуьшуьшра. ЯтIани, аламатдин кар я — ахварайни аквадайди гьа футбол тир…

А вахтунда Дагъустандихъ 2-лигада къугъвазвай Махачкъаладин «Динамо» команда авай. Футболдикай са жизви хабар авайбурни кваз, виридан рикI кудай и командадихъ. Са бубат чIехи хьайила, адан къугъунриз килигиз, чун Гилидилай меркездиз фидай вахтарни жедай. Виридалайни гзаф  Грозный шегьердин «Терекдихъ» галаз къугъун вилив хуьдай.

Гила, са шумуд цIуд йисарилай, элкъвена мад гьахьтин йикъар хквезва. ГьикI лагьайтIа, спортдин «Динамо» общество­дин 100 йисан юбилейдиз мукьва­ жез­вайла, и тIвар алай чи командади бо­лельщик­риз чIехи савкьат гьазурна — футболдин къведай сезонда Россиядин премьер-ли­гада къугъун. Заз, гъвечIи чIа­валай а командадин болельщик яз, виридан патай «Динамодиз» и зурба агалкьун мубаракиз кIанзава.

Кьилди закай рахайтIа, зун тум-кьил авачир кьван шад я. ГъвечIи чIавалай, цици мекерилайни, дуду кьамалай гъейри, захъ дамахдив алукIзавай футболкани авай. Адал виридаз аквадай рикI алай чкадал жува екедаказ ширедив чIугунвай «Д» лишан алай. И карди, заз чиз, зи гьиссерин кьадар хъсандиз къалурзава…

Руслан  Керимханов