2012-йисалай А. Саидован тIварунихъ галай Эминхуьруьн школада акьалтзавай несилдиз чирвилер ва тербия гузвай Межидов Эшреф Межидовичакай кхьизвай макъала за са риваятдилай башламишда.
…Чилел сад лагьай муаллим хайила, адан кьепIинихъ пуд малаик атаналда. «Вун гьамиша жегьил яз амукьда, гьикI лагьайтIа, ви къвалав гьамиша аялар жеда», — лагьаналда сад лагьай малаикди.
«Вун фикирралди ва руьгьдалди иер жеда, гьикI хьи, аялриз рикI багъишунилай намуслу ва михьи гьевес авач», — лагьана кьвед лагьай малаикди.
Пуд лагьайда лагьана: «Вун эбеди жеда, гьикI хьи, ви уьмуьр на тарс гайи сухтайри давамарда».
И риваятдай муаллимдин, насигьатчидин роль гьихьтинди ятIа, ачухдиз аквазва. Эшреф Межидович ажайиб кьисметдин инсан, лап хъсан муаллим, насигьатчи я. Адаз школадин муаллимрин, аялрин ва абурун диде-бубайрин арада еке гьуьрмет, авторитет ава.
Э. Межидов 1972-йисан 2- мартдиз Азербайжан Республикадин мулкунал бинеламиш хьанвай, Мегьарамдхуьруьн райондик кваз хьайи Храх-Уба хуьре дидедиз хьана. Ада сифтегьан классра Храх-Убадин школада, 6-8-классар Дербентдин 6-нумрадин школа-интернатда кIелна, 10-класс Къизилюрт шегьердин 5-нумрадин гимназияда 1989-йисуз акьалтIарна. 1990-1992-йисара армиядин жергейра къуллугъна хтай Эшреф Межидов Дагъустандин госуниверситетдин математикадин факультетдик экечIна, 1998-йисуз анаг акьалтIарна.
ДГУ-да 3-курс акьалтIарайдалай гуьгъуьниз ада Храх-Убадин ООШ-да муаллимвиле ва директорвиле кIвалахна. Гуьгъуьнлай Межидоврин хизан Мегьарамдхуьруьн райондин Советский хуьруьз хтана. Эшреф Межидова ана муаллим, завуч ва директор яз кIвалахна. 2012-йисалай инихъ Эшреф Межидовича, чна винидихъ лагьайвал, Эминхуьруьн школада математикадин муаллим, гьа са вахтунда тербиядин рекьяй директордин заместитель яз зегьмет чIугвазва.
– Эшреф Межидович чи школадин дамах я лагьайтIа, зун ягъалмиш жедач, – лугьузва мектебдин директор Османов Рагьман Салмановича. – Адан тешкилатчивилин алакьунар себеб яз, школада хъсанвилихъ еке дегишвилер хьана, тербиядин кIвалахни виликди фена. Эшреф муаллимди кьил кутуналди, чи школада жуьреба-жуьре гзаф мярекатар тешкилзава, чи муаллимри ва кIелзавайбуру районда ва адалай къеце тухузвай конкурсра, фестивалра, олимпиадайра иштиракзава, кIвенкIвечи чкаяр кьазва. Аферин ва баркалла гьахьтин муаллимдиз, тербиячидиз ва насигьатчидиз.
Эшреф Межидовича 2023-йисуз школада ачухай кIелзавайбурун лагердин начальниквални авуна. Лагердин хъсан кIвалахдай муаллимдиз РУО-дин начальник Гьуьсейн Шихбабаеван патай гьуьрметдин грамота гана.
1-категориядин муаллим Э. Межидовахъ хурудал алкIурдай «Дагъустан Республикадин образованидин отличник» лишан, РД-дин образованидин министр Я. Бучаеван къул алай ва маса грамотаяр, чухсагъулдин чарар ава. Дидед чIал хуьнай ва вилик тухунай 2023-йисуз Э. Межидоваз чухсагъулдин чар «Лезги газетдин» кьилин редактор Мегьамед Ибрагьимовани гана.
Эшреф муаллимдин руш Миленади, Дагъустандин халкьдин майишатдин университетдин юридический факультет акьалтIарна, вичин пешедай кIвалахзава. Чи мурад Эшреф Межидовичахъ мягькем сагъламвал, четин, гьа са вахтунда гзаф гьуьрметлу кIвалахда мадни еке агалкьунар хьун я.
Хазран Кьасумов
