Дармандин набататар
Хамзарар (малина) тамара, кIамара, маса затI цан тийиз гадарнавай чкайра, хсуси салара экъечIда. Гьар са набататдикай хьиз, хамзардикайни инсанри дармандин такьатдин еринда менфят къачузва. Пешекарри тестикьарзавайвал, гьам тама, гьамни багъда битмиш хьанвай хамзарар июлдизни августдиз кIватIиз жеда. Дармандин еринда ишлемишун патал абур 35-40 градус чимивал авай пичера ва я махсус чкайра кьурурун герек я. Бязи вахтара абур тамамдиз кьурурдалди вилик ракъинал штIумарзава.
Пешекарри хамзаррин мураба мекьи хьайила ишлемишдай хъсан такьат яз гьисабзава. Хамзарди мефтIедин кIвалах хъсанарзава. Адак квай антиоксидантри рикIел аламукьунин алакьун вахтунилай фад зайиф тахьуниз хъсан патахъай таъсирзава. Ивидик квай шекер тIимилардай къуватни ава хамзаррихъ.
Хамзаррикай гегьенш малуматар, абур ишлемишдай къайдаяр пешекарривай хабар кьун хъсан я. Винидихъ къейднавайбурулай гъейри, адак маса жуьредин такьатарни ква.
«Лезги газет»
