Дуьньяда пешейрин кьадар дуьм­-дуьз гьикьван аватIа лугьун хьиз, абурун арадай жуван рикIиз хушди хкягъунни бязи вахтара четин я. За жуван ­уьмуьрдин пеше яз рикIин ашкъидалди журналистика хкянава: неинки пеше, гьакI майил, жавабдарвал тирди гьисс авуналди. Неинки жуван макъалайрин ва сюжетрин, гьакI халкьдив гаф вавай дуьз агакьариз  хьунин жигьетдай.

Интернетди­ гьар садан уьмуьр­да еке чка кьаз­вай алай девирда, гьакъикъатни, гьахълувал­ тапаррикай чара ийиз хьун регьят туш. Йикъалай-къуз артух жезвай, чеб блогерар я лугьуз, гьа­къикъатдихъ галаз кьун тавунвай малуматар йигинвилелди чу­кIурзавайбуру кьилин кар рикIе­лай ракъурзава: журналист гьар гьихьтин хьайитIани малумат чу­кIурунин рекье йигинвал къалурзавайди ваъ, анжах гьакъикъатдихъ галаз кьунвай, общество ва адетдин агьалияр патал хийирлу малумат агакьарзавай халис пешекар я.

Журналиствилин пешедихъ­ ви­ри вахтара важиблувал, игьти­яж авай. Къенин юкъуз тIебии тушир интеллектди (ИИ) ярат­ми­шунрин­ рехъ гзафбуруз акьван кьезиларнава хьи, и ва я маса макъала кхьидайла, тема ва кьилин сад-вад­ гаф-цIар кхьиналди, «робот» кIва­лахдик кутаз, гьар сад «журналистдиз» элкъвенва. Амма жедани ихьтин касдиз халис пешекар лугьуз? Алакьдани роботдивай сифте нубатда ­инсандиз тIебиатди ганвай яратмишунрин бажарагъдикай, кье­тIен хатIуникай менфят къачуна, дуьз затI арадал гъиз? Бес гьиссер авачир машиндивай «чан алай затI» – марагълу макъала арадал гъиз жедани? Гьавиляй, заз чиз, къенин юкъуз журналист­вилин пешедихъ мадни еке важиблувал, гереквал, къиметлувал ава. За и рехъ хкягъунал шадвалзава.

Къуй вири пешейрин сагьиб­рихъ сагъвал, рикIин шадвал, жур­налистризни анжах ислягь уьмуьрдикай, вахтарикай, гьакъисагъ зегь­метдикай хабарар агакьарун кьисмет хьурай!

ДГУ-дин филфакдин ОЖ-дин 2-курсунин студентка