Гьазурвал аквазва

Дагъустандин газдин хилен пешекарри 100 километрдилай виниз газдин сетар ахтармишда. Идакай «Дагъустан патал газ» телеграм-каналди хабар гузва.

«Газпром газораспределение Дагес­тан» ва «Газпром газораспределение Махачкала» компанийри вилик квай чимивилелди таъминардай муддатдиз гьазурвал акунин серенжем гатIуннава.

Гьазурвилер акунин сергьятра аваз пешекарри 100 километрдилай виниз мензилда газдин турбаяр авай гьалдиз къимет гуда, тахминан 1330 ГРП (газорегуляторные пункты) ремонт ийида, 3 агъзурдалай гзаф даяхар дегишарда.

Чешмедин делилралди, кьилин кIва­лахар Тарумовка, Къизляр, Хасавюрт, Та­басаран, СтIал Сулейманан, Ботлих, Къумторкъала районра ва Махачкъала шегьерда кьиле фида. Алатай йисав ге­къи­гайла, ремонтдин кIвалахар пулдин такьатралди таъминарунин кьадар 35 процентдилай гзаф артухарнава.

Газдин идарайрин регьбер Ризван Мурадован гафарай малум жезвайвал, винидихъ къейднавай серенжемрилай гъейри, махсус программадин сергьятра аваз Махачкъалада куьгьне хьанвай газдин сетар цIийи хъийиз гатIуннава.

Хабар гузвайвал, кIвалахдин план туькIуьрдайла алатай чимивилелди таъминардай муддатдин вахтунда агьалийрилай атай арзаярни фикирда кьунвай.

Эхиримжи вад йисуз

Эхиримжи вад йисуз Дагъустандин здравоохраненидин хел цIийикIа туькIуьр хъувунин программа кьилиз акъудунин нетижада республикадин районрин ва шегьеррин медицинадин идарайрив 4000-далай виниз алай аямдин истемишунриз жаваб гузвай техника агакьнава. Идакай РД-дин здравоохраненидин министерстводин телеграм-каналди хабар гузва.

Медидараяр алай аямдин техникадалди таъминаруни гьам начагъбур диаг­ностика ийиз куьмекзавай бязи тадаракар, мисал яз, рекъемрин рентгенар ва кардиографар, гьамни агъур техника – КТ  ва МРТ – цIийи хъийидай мумкинвал ­гана.

Чешмедин делилралди, 2026 лагьай ва гуьгъуьна авай йисара республикадин медидараяр патал цIийи техника маса къачунин кIвалах давам жезва.

Агъзурдалай гзаф

Дагъустанда линейный ускорителрин (ЛУ, медицинада сагъар хъувунин карда менфят къачузвай тадаракрикай сад) куьмекдалди агъзурдалай гзаф вини дережадин серенжемар кьиле тухванва. Идакай РД-дин здравоохраненидин министерстводин телеграм-каналди хабар гузва.

Кьилди къачуртIа, ЛУ-яр кардик кутурдалай кьулухъ республикадин онкологиядин центрада 1000-далай гзаф лучевой терапиядин серенжемар кьиле тухванва.

Чешмедин делилралди, онкологиядин азаррик начагъбуруз и тадаракдикай менфят къачуна гузвай куьмекдин кьадар гзаф хьанва. ИкI, 2024-йисуз ЛУ-яр кардик кутуна 400 серенжем кьиле тухвана, 2025-йисуз — 435.

Чагъаяр хьуниз талукь яз

Дагъустанда 2026-йисан сифтегьан кьуд вацра 13 агъзурдалай виниз чагъа­яр дуьньядал атанва. Идакай РД-дин здравоохраненидин министерстводин те­леграм-каналди хабар гузва.

Кьилди къачуртIа, чешмеди раижза­вайвал, республикадин аялар хадай кIва­лера алай йисан 1-январдилай 30-апрелдалди 6415 рушни 6907 гада хьанва, умуми кьадар — 13 322 аял.

Гьа са вахтунда хабар гузвайвал, абурукай 77 дуьшуьшда дидейриз кьветхверар хьанва.

Мукъаят хьухь!

Эхиримжи вахтара Дагъустанда кьакьан гьавайрин кIвалерин дакIаррай бицIи аялар аватзавай дуьшуьшар гзаф хьанва. Анжах эхиримжи вацра республикада ихьтин кьве дуьшуьш арадал атана, аялриз еке хасаратвилер хьана. Идакай РД-дин транспортдин ва рекьерин майишатдин министерстводин телеграм-каналда хабар гузва.

ТIвар кьунвай министерстводи да­гъус­танвийривай хатасузвилин кар алай къайдайрал амал авун тIалабзава:

— ахъа дакIарар авай кIвалера гъвечIи аялар гуьзчивал алачиз тамир;

— дакIаррал махсус тадаракар (фиксаторар) эциг, абур алайла, аялдивай да­кIар ахъайиз жедач;

— дакIарриз мукьва мебель эцигмир, мумкин я, абурун куьмекдалди аялар да­кIарриз акьахда;

— аялар ахъа дакIаррин вилик къугъунар авун хаталу тирдан гъавурда тур.

Гьазурайди – Муса  Агьмедов