Абад Азадов
28-июлдиз Махачкъаладин футболдин «Динамо» команда Краснодарда чкадин командадихъ галаз гуьруьшмиш хьана. Пешекарри виликамаз «Динамо» еке гьисабдалди кумукьдайдакай малумарнавай. Идахъ себебарни авай. Краснодардин футболистри пуд сеферда Россиядин чемпионатда буьруьнждин, кьве сеферда Россиядин кубок патал акъажунра гимишдин медалар къачунва. Абуру са шумуд сеферда Европадин Лигадин къугъунра иштиракдай ихтияр къазанмишна. Шазни «Краснодарди» Россиядин чемпионатда 4-чка кьуна. Адав гекъигайла, «Динамодихъ» тарифдай са нетижани авачир. Гьавиляй пешекарар гьахьтин фикирдални атанвай.
Амма Махачкъаладин футболистри сифте декьикьадилай чпин къастар масадбур тирди къалурна. Абуру «Краснодардин» варарал сад-садан гуьгъуьналлаз гьужумарна. Варарин вилик лап къалабулух кутадай гьалар арадал гъана. Къугъунин 14-декьикьада Ражаб Мегьамедова ягъай туп вратарди кьуна. 45-декьикьада Сердер Сердерован туп варариз фин герек тир. Амма… Адавай мад са мумкинвиликай менфят къачуз хьанач. Сад лагьай тайм 0:0 гьисабдалди акьалтIна.
Са рахунни алач, «Краснодардин» тренерди вичин футболистриз гъуьнтI гайи хьтинди я. Кьвед лагьай паюна, на лугьуди, абур ахварикай кватна. Иесийри мад туп махачкъалавийрив вахканач. ЧIехи пай вахтунда абуру «Динамодин» вратарь Давид Волка хуьзвай варарал акьван гьужумар авуна хьи, къурхулу гьалар гзаф хьана. Судьядизни «Краснодар» гъалиб хьана кIанзавай хьтинди тир. Къугъунин вахт куьтягь хьайила, ада мад алава 9 декьикьада къугъвадай ихтияр хгана. Краснодарвийри вири къуватралди гьужумна, амма абур гьикьван алахънатIани, «Динамодин» варариз туп ягъиз хьанач. Гьа икI, Махачкъаладин «Динамоди» лап четин къугъуна мад са очко къазанмишна ва турнирдин таблицада 11-чка, «Краснодарди» 10-чка кьунва.
