Саласа юкъуз РД-дин Гьукуматдин Председатель Абдулмуслим Абдулмуслимова республикадин базарра маса гузвай жуьреба-жуьре метягьрин къиметриз талукьарнавай совещание кьиле тухвана.
Премьер-министрди къейд авурвал, региондин гьукумдин органри недай-хъвадай суьрсет маса гузвай базаррин къиметрал датIана гуьзчивалзава, и кIвалах Россиядин Президентди тестикьарнавай РФ-дин суьрсетдин хатасузвилин доктринадин сергьятра аваз тешкилзава.
Ада гьакIни хабар гайивал, гьукумдин органрин векилрин докладрай малум жезвайвал, цIинин мартдин эвел кьилера яшайишдин жигьетдай метлеб авай суьрсетдин метягьрин къиметар алатай йисан гьа и вахтунда авай къиметриз барабар я. Гьа са вахтунда бязи метягьрин къиметар хкаж хьанва.
«Вечрен какаяр, як, некIедин суьрсет, картуфар багьа жезва. Идахъ галаз алакъалу яз, ихьтин суал арадал къвезва: Дагъустанда ири карч алай гьайванрин, некIедин кьадар артух жезва, некIедин метягьрин цIийи комплексар кардик кутазва, картуфрин бегьерар кIватI хъувунай республикади план тамамдиз ацIурнава, региондин хуьруьн майишатдин ва суьрсетдин министерстводи хуьруьн майишатдал машгъул жезвайбуруз датIана куьмекар гузва. Бес къиметар хкаж хьунин себеб вуч я?
И кар агьалийри як, некIедин продукция, картуфар ишлемишзавай кьадардилай аслу яни? И жигьетдай гьихьтин делилар ава? Я тахьайтIа, белки и кар винидихъ тIвар кьунвай суьрсет къецепатан базарриз рекье тунихъ галаз алакъалу ятIа? И суалдин патахъай суьрсет гьасилзавайбурун, алишверишдал машгъул жезвайбурун фикирар гьихьтинбур я? И месэлайрин жигьетдай кIвалах тухванвани? ТахьайтIа, чна исятда ихьтин гьалар ава лугьуз хабар гузвани?» — суалар эцигна гьукумдин жавабдар органрин вилик А.Абдулмуслимова.
Недай-хъвадай суьрсетдин къиметриз талукь докладар гваз совещанидал республикадин са шумуд министерстводин кьилевайбур рахана.
Гьукуматдин Председателди жавабдар органриз Сив хуьнин суварихъ галаз алакъалу яз, са бинени авачиз, суьрсетдин къиметар хкаж тийидайвал, и месэла кьетIен гуьзчивилик кутун тапшурмишна.
Гегьеншдиз РД-дин Гьукуматдин сайтдай кIелиз жеда.
Агьмед Магьмудов
