31-январдилай 2-февралдалди Владимирдин областдин Суздаль шегьерда Россиядин кIвенкIвечивал патал грекринни римлуйрин жуьреда кьуршахар кьунай кьиле фейи акъажунра вичин ери-бине Кьурагь райондин КIирийрин хуьряй тир Али Ярагьмедова 2-чка кьуна.
Чечня Республикадин меркез Грозныйда, Бувайсар Сайтиеван тIварунихъ галай спорткомплексда, СКФО-дин кIвенкIвечивал патал грекринни римлуйрин жуьреда кьуршахар кьунай 18 йисал къведалди яшара авай жегьилрин арада акъажунар кьиле фена са акьван вахт алатнавач. Ана тамам кьве юкъуз 400-далай виниз спортсменри гьасиррал чпин устадвал къалурнай. Гьайиф хьи, чи миллетдин векилрин кьадар ана лап тIимил тир. Ана Али Ярагьмедова 110 кг-дин заланвал авайбурун арада 1-чка кьунай. Им жегьилди инанмишвилелди виликди къачунвай мягькем мад са кам тир. ГьикI хьи, СКФО-да гъалибвал къазанмишуни Россиядин кIвенкIвечивал патал акъажунра чпин гьунарар къалурдай мумкинвал гузвай.
КьетIендаказ къейд ийиз кIанзавай кар мадни ам я хьи, А. Ярагьмедова азаддаказ кьуршахар кьунайни вичин алакьунар къалурзава, нетижаярни писбур туш. Мукьвара СКФО-дин кIвенкIвечивал патал азаддаказ кьуршахар кьунай акъажунра ам 2-чкадиз лайихлу хьана. Ина чи ватанэгьлийрикай мад сада — Белиждай тир Мугьаммад Эседуллаева (57 кг-дал къведалди заланвал авайбурун арада) 2-чка кьуна.
Рагнеда Рамалданова
