«Гельверан йиф» – фестивалдин сегьнеда
И йикъара Чечнядин меркез Грозныйда 2019-йисалай РФ-дин театрдин деятелрин союздин къаюмвилик кваз тешкилзавай Вирироссиядин милли театррин «Федерация» фестиваль кьиле фена. Лезгийрин СтIал Сулейманан тIварунихъ галай госмуздрамтеатрдин коллективдизни ана чIехи сегьнедал экъечIдай, театрриз, халкьариз ва абурун яратмишунриз талукь, медениятдин зурба серенжемда иштиракдай мумкинвал хьана.
Жюридин членрин арада Россиядин машгьур театроведар ва театрдин критикар авай. Кьилди къачуртIа, Елена Дунаева, Ярослав Седов, Екатерина Морозова, Нина Монова ва Владимир Стаценко.
ИкI, гила 7-сеферда кьиле фейи фестивалда Лезги театрди Ингмар Вилквистан «Гельверан йиф» пьесадай эцигнавай гьа ихьтин тIвар алай тамаша къалурна. Адан режиссёр-постановщик ва художник Дагъустандин искусствойрин лайихлу деятель Дмитрий Павлов тир. Тамашади критикрин, экспертрин ва тамашачийрин патай еке къимет къачуна.
Экспертри къейд авурвал, «Гельверан йиф» арадал гъиз хьун четин кIвалахрикай сад я. ГьикI хьи, дуьньядин санлай мусибат кьилдин, вич руьгьдай михьиз аватнаваз, кьиникь къутармиш хьунин кьилин къуват яз кьабулзавай инсандин бедбахтвилин лишанралди къалурзава. Къенин юкъуз вичихъ иллаки чIехивал, жуьрэтлувал авай ва кичI кутазвай къуватдин куьмекдалди.
«КьетIенди, четинди ва алай аямдив кьунвайди я. Психологиядин драматургиядихъ галаз акьван устадвилелди кIвалахнава хьи, лугьуз жеда, четин рекьяй фенва, амма виниз тир дережада аваз. Актеррин кIвалах хъсанди хьанва, девирдин гьалар ачухарзава ва абур дериндай гьисс ийиз туналди, дериндай къалуриз алахънава, куьлуь-шуьлуьяр галаз метафорайрин ва яржарин куьмекдалди психологиядин жигьетдайни къаматар дериндай ачухарнава. Чаз театрдихъ гьа ихьтин дережада аваз тамаша маса сегьнейрани къалурун давамардай къуватар хьана кIанзава, - алхишна театрдин коллективдиз критикрин коллегиядин член, театровед, театрдин критик, РФ-дин культурадин лайихлу къуллугъчи Нина Моновади.
Тамаша куьтягь хьайила, Ярослав Седова ва фестивалдин директор Хава Агьмадовади лезги театрдин коллективдиз фестивалдин иштиракчидин диплом ва кубок гана.
Регина Семедова