«Россиядин Яшайишдин фондунин Дагъустанда авай отделениди 2025-йисуз 40 агъзурдалай виниз дишегьлияр патал аялар хунихъ галаз алакъалу (родовой) сертификатар гана», — хабар гузва идарадин пресс-къуллугъди.
Дишегьлидивай и сертификат вич кIвачел залан хьайи вахтунда, учётда акъвазай вацралай аслу тушиз, дишегьлийрин консультацияда ва я аял хазвай кIвале къачуз жезва. Гележегдин дидейриз адан такьатрин гьисабдай тир пул дишегьлийрин консультацийрин къуллугърай, аял хадайла ва адалай гуьгъуьниз медицинадин куьмекдай, гьакIни йисал къведалди аялдин гьал ахтармишунай (профосмотр) гудай ихтияр ава. КIвачел заланзавай дишегьлиди сертификат къачурла, адаз вичиз хуш тир клиника хкядай ва ана гуьзчивилик жедай ихтияр жезва. Алатай йисуз, винидихъни къейднавайвал, чи республикада 40 агъзурдалай виниз дишегьлийри ихьтин сертификатрикай менфят къачуна.
Къейд авун лазим я хьи, сертификатдин пул дидейрин гъиле жезвач. Гележегдин диде учётда акъвазнавай дишегьлийрин консультациядай Яшайишдин фондунин Дагъустанда авай отделенидиз идакай хабар агакьарзава. И делилдин бинедаллаз фондуни медицинадин идаради кьилиз акъудзавай къуллугърай пул гузва.
«Сертификат дидедиз гузва, аялдиз – ваъ. Гьаниз килигна, дишегьлиди дуьньядиз санал са шумуд аял акъудайтIани, анжах са сертификат гуда. Алукьнавай йисан алатнавай варзни са шумуд юкъуз Яшайишдин фондунин Дагъустанда авай отделениди 3500 бицIек дуьньядиз атунин медицинадин къуллугърай пул чара авунва. «Родовой сертификат» – им гьукуматди аял хазвай дишегьлидиз медицинадин лазим вири куьмек агакьарун заминламишун я. Иник гележегдин диде дишегьлийрин консультациядиз сад лагьай сеферда финилай эгечIна, тамам са йисалди аялдин сагъламвилин гьал ахтармишунал къведалди лазим вири куьмек ква», — къейдзава Россиядин Яшайишдин фондунин Дагъустанда авай отделенидин управляющийдин везифаяр тамамарзавай Алжанат Загьидовади.
РикIел хкин: «Сагъламвал» милли проектдик акатзавай «Родовой сертификат» программади чи уьлкведа 2006-йисалай кIвалахзава. Виликдай сертификатдин бланк медицинадин идарадиз дишегьлиди вичи агакьарна кIанзавай. Гила ахьтин лазимвал амач, герек тир вири делилар Яшайишдин фондунин отделениди агакьарзава. Рекъемрин жуьредин сертификатди медицинадин къуллугъчийриз документ ацIурунихъ галаз алакъалу яз хейлин кьезилвилер ганва, кIвачел залан дишегьлидизни — къулайвал.
Рагнеда Рамалданова
