Кеферпатан Кавказдин жегьилрин чирвилерин международный «Каспий-2026» 13-форум Дербент шегьерда «Патриот» паркуна вад юкъуз­ кьиле фена. Сиясатдин,­ яшайишдин ва чирвилерин форумдин макь­сад уьлкведин  регионрин ва Каспий гьуь­луьн къерехрив гвай государствойрин жегьилрин арада дуствилин, сада-садаз куьмек авунин алакъаяр гегьеншарун, хъсан тежрибадикай менфят къачудай шар­тIар тешкилун, халкьдин майишатдин бя­зи хилер вилик тухудай теклифар гун ва жегьилрихъ галаз кIвалахдай менфятлу, цIийи жуьреяр, къайдаяр туькIуьрун я.

Алатай йисара хьиз, «Каспий» форумди вичин майданрал гзаф жегьилар кIватIна, абуру чпин алакьунарни раижна. Форумдин эхиримжи юкъуз иштиракчийриз РД-дин Кьилин везифаяр вахтуналди  тамамарзавай Федор Щукин мугьман хьана, ада гъалибчийрив Россиядин жегьилрин крарин рекьяй агентстводин грантар вахкана. Гьа са вахтунда ада жегьилрихъ элкъвена, лагьана:

– Алай йисуз форумди вичин майданрал маса уьлквейрин векиларни кваз 500 кас кIватIна. Абурухъ галаз сиясатдин ва жемиятдин 50-далай виниз деятелри, алимри, публицистри, Россиядин Игитри, машгьур спортсменри кIвалахна, лекцияр кIелна, мастер-классар кьиле тухвана, чпин тежрибадай чирвилер, вердишвилер гана. Им лап хъсан кар я.

Зун Дагъустандин жегьилрин уьмуьрдиз кечирмишиз кIанзавай проектрихъ галаз таниш хьана. Абур гуьгьуьллубуруз, ватанпересвилин тербия гуниз, карчивилиз, алай аямдин техноло­гийриз, медицинадиз ва образованидиз талукьбур я.  Проектрин дережа ва нетижаяр фикир желбдайбур я. Заз жегьилриз виликди финин карда куьмекар гузвай форумдин тешкилатчийриз, насигьатчийриз, волонтерриз сагърай лугьуз кIанзава. ЧIехи мярекат лап хъсандиз тешкилнавай, адан нетижаярни разивалдайбур я, – къейдна республикадин регьберди.

Дагъустандин жегьилрикай Россиядин жегьилрин крарин рекьяй агентстводин грантар­ кIуьд касдив агакьна. Санлай къачурла, 4,6 млн манатдин къимет авайбур. Халкьдин майишатдин жуьреба-жуьре хилериз талукьарнавай хъсан проектрин сагьибрик вад рушни кьуд гада­ акатзава: Раисат Алибегова, Заира Мегьамедова, Айшат Гьажиева, Сайгибат Дадукубаева, Асият Шапиева, Эседуллагь Салагьов, Нариман Нуьгьов, Марат Султанов ва Арсений Къурбанмегьамедов.

Гъалибчийрив грантар вахкузвай вахтунда РД-дин Гьукуматдин Председатель Мегьамед Рамазанова чи уьлкведа жегьилриз чпин алакьунрикай менфят къачудай вири рекьер ачухнавайди къейдна:

– Эгер жегьилдихъ вичин мурад аватIа, ам уьмуьр­диз кечирмишдай мумкинвални герек къвезвайди я. Къе гзафбуруз чпин алакьунар бегьерлу крариз элкъуьриз кIанзава. Амма виридаз­ квелай ва гьикI гатIундатIа чизвач. «Каспий» хьтин форумрин макьсадни гьахьтин жегьилриз куьмек гун я, – лагьана М. Рамазанова. – Чи жегьилри кьил кутазвай, республикадиз хийир гудай хъсан крарилай, проектрилай за пара разивалзава. Гьукуматди гузвай куьмек фикирда кьуна, виликди фидай жегьилар гьикьван гзаф хьайитIа, гьакьван хъсан я.

Абад Азадов