Мегьарамдхуьруьн райадминистрацияда дяведин махсус серенжемдин иштиракчияр ва абурун хизанрин векилар кьабулна. И гуьруьшда муниципалитетдин кьил Нариман Эфендиева, райондин прокурор Саид Мугадова, военный комиссар Эльман Гьажиева, администрациядин жавабдар къуллугъчийри, яшайишдин хилен ва коммунальный къуллугърин регьберри, жемиятдин «Память гор» тешкилатдин векилри иштиракна.

Гуьруьшдиз атанвай СВО-дин иштиракчийриз ва абурун хизанриз чир хьана кIанзавай месэлаяр садни кьвед тушир: дяведин махсус серенжемдин иштиракчияр чилин участок­ралди таъминарун; хсусият, эменни тайинарзавай документар туькIуьрун; яшайишдин кIвалериз газ гъун; электро­энергиядин линияр тухун ва ремонт хъувун; куьчеяр, магьлеяр аваданламишун; Кркарин хуьруьз цин линия тухун. Самур пата авай агьалийри ракьун рекьихъ галаз алакъалу месэлаяр гьялун ва, яд акьалтайла, зиянар хьайибуруз куьмек гун тIалабна. Гьелбетда, вири месэлаяр федеральный ва республикадин законрив кьадайвал.

Нариман Эфендиева гьар са месэладиз талукь яз тамам жавабар гана. Ада лагьайвал, муниципалитетдиз талукь месэлаяр кардик квай законрин бинедаллаз ва герек тир вири къайдайрал амал авуна гьялда. Ракьун рекьихъ галаз алакъалу месэлаяр «Россиядин ракьун рекьерин»  ОАО галачиз гьялиз жедач. Ам федеральный къурулуш я. Агьалияр кIеве твазвай дердийрикай анизни хабарда.

Прокурор Саид Мугадова гуьруьшдиз атанвайбур гьар са касдин ва абурун эменнидин, хсусиятдин ихтиярар хуьниз талукь къанунрин гъавурда туна. Гьа са вахтунда агьалийри раиж авур вири арзаяр, месэлаяр Нариман Эфендиева вичин гуьзчивилик жедайдакай малумарна.

*  *  *

Администрацияда Нариман Эфендиева, дяведин махсус серенжемда иштиракдайла, вилик эцигнавай четин ­тапшуругъар кьилиз акъуддайла телеф хьайи Максим ­Керимован дидедив Жуьрэтлувилин орден вахкана.

 Муниципалитетдин регьберди аскердин дидедихъ галаз кIвалин-къан дердийрикай, яшайишдикай суьгьбетна, кIеве твазвай месэлаяр аватIа, куьмек гудайдакай лагьана.

Абад  Азадов