5-октябрдиз РД-дин образованидин ва илимдин министерствода XIV Вирироссиядин «Россиядин тербиячияр» конкурсдин республикада кьиле тухвай  паюна гъалиб хьайи аялрин бахчайрин педагогрив шабагьар вахкунин мярекат кьиле фена.

ИкI, РД-дин образованидин ва илимдин министрдин везифаяр тамамарзавай Ягья Бучаева I,  II ва  III лагьай дережайрин дипломар республикадин 28 педагогдив вахкана. 

Конкурсда аялар мектебдиз фи­далди­ гьазурдай идарайрин (бахчайрин) регьбер­ри ва  муаллимри иштиракна. Кьилди къа­чуртIа, абуру чпин пешеда ишлемишзавай­ къайдаяр, тежриба майдандиз акъудна, ая­лар тербияламишунин, абур вири пата­ри­хъай вилик тухунин карда менфятлу къайдаяр раижна.

Акъажунар муьжуьд рекьяй тухвана: «Агалкьунар авай тербиячи», «Жегьил пешекарар», «Образовани­дин идарадин виридалайни хъсан пе­шекар», «Агалкьунар авай регьбер»­, «Насигьатчи – им гьевес я», «Мектебдиз фидалди инклюзивный­ образование гунин виридалайни хъсан теж­риба», «Россиядин миллетрин садвал, ислягьвал ва халкьарин арада разивал мягькемарунин  рекье виридалайни хъсан тежриба» ва махсус номинация – «Яратмишунардай педагог – яратмишунардай аялар».

Нетижада республикадин аялар мектебдиз фидалди гьазурдай идарайрин векилар тир 28 педагог шабагьриз лайихлу хьана. Малум хьайивал, абурун арада Мегьарамдхуьруьн райондин Къуюстанрин хуьруьн аялрин  «Буратино» бахчадин тербиячи Велибегова Эсмира Мирзаметовнани ава. Ам Вирироссиядин «Россиядин тербиячияр» XIV конкурсдин III лагьай дережадин дип­ломдиз лайихлу хьанва. Конкурсдин республикадин паюнин гъалибчийри федеральный дережада кьиле тухудай акъажунра  иштиракда.

Тербиячидин кIвалах мектебдин девир эгечIзавайда­кай хабар гузвай зенгинилай фад башламиш жезва. Бахчада аялдиз масабурухъ галаз рафтарвал ва ихтибар ийиз­, вичин хиве авай кIвалахар масадан куьмек галачиз кьилиз акъудиз ва цIийи рекьер ачухиз чирзава. Гьаниз килигна, аялар  бахчада тербияламишзавай педагогдин пешекарвилин дережадилай абурун гележегдин агалкьунар аслу я.

Жасмина  Саидова