Алатай гьафтеда Россиядин журналистрин союздин РД-да авай отделениди республикадин жуьреба-жуьре СМИ-рин векилар патал ифтар (рамазандин вацра сив хуьзвай мусурманри нянихъ сив хкуддайла тIуьн тIуьниз лугьуда) тешкилнавай. Ана РД-дин информациядин ва печатдин Агентстводин кьил Арсен Юсупова, винидихъ тIвар кьунвай отделенидин председатель Мегьамед Ибрагьимова, «Дагъустан» РГВК-дин, ГТРК-дин директорри, милли чIаларал акъатзавай газетрин, журналрин кьилин редакторри, мухбирри иштиракна.
Мегьамед Ибрагьимова кIватI хьанвайбуруз пак рамазандин варз мубаракна ва и вацрахъ мусурманар патал авай чIехи метлебдикай суьгьбетна. «Уьмуьрдин гьар са макъамда Аллагьдихъ агъазвай инсан гьахъ гваз рахана кIанзава. И гьакъикъат чи кIвалахдани кар алай дестекрикай сад я. Халис журналистри гьамиша гьахълувилин тереф хуьда. Къуй чун сифте нубатда Аллагьдин, ахпани сад-садан, чи кIелзавайбурун вилик гьахълубур яз амукьрай», — лагьана ада.
Мярекатдин сергьятра аваз, РФ-дин журналистрин союздин РД-да авай отделениди, Хайи чIалан международный йикъаз талукьарна, республикадин милли газетра кIвалахзавай журналистрин арада кьиле тухвай конкурсдин гъалибчийрив шабагьарни вахкана.
ИкI, «Рекъемрин технологийрин девирда хайи чIалар гьикI хуьда ва вилик тухуда?» темадай виридалайни хъсан макъала кхьинай 1-чкадиз «Лезги газетдин» кьилин редактордин заместитель К. Ферзалиев лайихлу хьана. Адав дипломни 30 агъзур манатдин кьадарда авай пулдин пишкеш вахкана. 2-чка – цIахур чIалал акъатзавай «Нур» газетдин редакциядин отделдин редактор Къ. Омаханова ва 3-чка «Агъулрин хабарар» газетдин кьилин редактор А. Мегьамедовади кьуна. Абур дипломризни 20, 10 агъзур манатдин кьадарда авай пулдин пишкешриз лайихлу хьана.
Къейд ийин хьи, гьам ифтар, гьамни конкурс «Лезги газетдин» вафалу амадагрикай сад, РД-дин информациядин ва печатдин Агентстводин регьбердин меслятчи Мурад Мегьамедкеримован куьмекдалди тешкилнавай. М. Ибрагьимова журналистрин тешкилатдиз датIана куьмекар гунай Мурад Федрияновичаз сагърай лагьана.
Агьмед Магьмудов
