17-апрелдиз Махачкъалада, «Лезги газетдин» редакцияда, Ислам диндиз талукьарна гьар йисуз рамазандин вацра хайи чIалал акъатзавай кьилин газет кIелзавайбурун арада кьиле тухузвай конкурсдин гъалибчийрив савкьатар вахкана. Къейд ийин хьи, конкурс «Лезги газетдин» редакциядин куьмекдалди Алкьвадар Гьасанан тIварцIихъ галай медениятдинни марифатдин центради тешкилзава ва цIи ам 6-сеферда кьиле фена.
Мярекатда тIвар кьунвай центрадин директор, «Лезги газетдин» кьилин редактор Мегьамед Ибрагьимова, диндин алим, конкурсдин жюридин председатель Ямин Мегьамедова, жемиятдин векил, машгьур меценат Нариман Гъазалиева иштиракна.
Гаф кватай чкадал лагьана кIанда, цIи конкурс тешкилун патал пулдин такьатар вичин патай Нариман Гъазалиева чара авуна. Савкьатрин фондуни, санлай къачурла, 90 агъзур манат тешкилна. Им Нариман Гъазалиевича диндин ва яшайишдин маса хилерай тухузвай мярекатриз пулдин такьатар чара ийизвай сад лагьай сефер туш. РикIел хкин, алатай йисуз ада Кьиблепатан Дагъустандин мектебра кIелзавай аялрин арада виридалайни хъсандиз Къуръан кIелунай чIехи конкурсни тешкилнай. Къуй вичелай Аллагь рази хьурай!
Конкурсдин нетижайралди, 1-чкадиз Кьурагь райондин Гелхенрин хуьряй тир Зугьраб Абдурагьманов, 2-чкадиз — Ахцегь райондин Луткунрин хуьряй тир Абдулла Мегьамедов, 3-чкадиз СтIал Сулейманан райондин Кьасумхуьрелай тир Демир Шагьбанов лайихлу хьана. Виликан йисарилай тафаватлу яз, тешкилатчийри цIи 4 ва 5-чкаяр кьурбурузни шабагьар гудай къарар кьабулна. ИкI, кIвенкIвечи чкаяр кьурбурун сиягьдик мад Ахцегь райондин Луткунрин хуьряй тир Алияр Мегьамедовни (4-чка) Дербент шегьердай тир Роксана Исмаилова (5-чка) акатна.
Конкурсдин гъалибчи З. Абдурагьмановаз диплом, 15 агъзур манат пул ва конкурсдин кьилин пишкеш телефон гана. Абдулла Мегьамедов дипломдиз, 12 агъзур манатдин кьадарда авай пулдин пишкешдизни электронный къайдада туькIуьрнавай Къуръандиз лайихлу хьана. Демир Шагьбановав диплом, 9 агъзур манат пул ва капI ийидай халича вахкана. 4, 5-чкаяр кьурбуруз дипломар, 5 агъзур манатдин кьадарда аваз пулдин пишкешар ва рикIел аламукьдай савкьатар гана. Идалай гъейри, вири гъалибчийрив тешкилатчийрин патай «Зам-Зам» ядни вахкана.
Мярекатдин эхирдай Мегьамед Ибрагьимова конкурсдин кIвалахриз къимет гунай Ямин Мегьамедоваз ва пулдин такьатар чара авунай Нариман Гъазалиеваз мад сеферда сагърай лагьана, гъалибчийризни агалкьунар мубаракна.
Агьмед Магьмудов
