И сеферда чна кIелзавайбурун вилик композитор Керимхан Бабаева (1939-1992) Желил Мурадалиеван гафариз теснифнавай «Гуьлжагьан» мани гъизва. Бажарагълу композитордин и эсер тамамарзавай кьуд манидар малум я: Дурия Рагьимова, Рустам Къарибов, Суьлгьуьят Гьажиева ва Фамик Къадимов. 

Гаф кватай чкадал къейд ийиз кIанзава хьи, интернетдин сергьятра Керимхан Бабаев тIвар кьунвай манидин гафарин мусаниф яз къалурзава. Им, гьелбетда, чи къенин «бажарагълу музыковедри» ахъайзавай еке гъалатI я. Мани тамамардай вахтунда манидарри чпини гъалатIриз рехъ тагана тазвач. Мегьарамдхуьруьн райондин Къансаврин хуьре дидедиз хьайи Керимхан Бабаев гзаф манийрин мусаниф я, амма композиторди теснифнавай «Гуьлжагьан» ва «Зи чубарук» манияр халкьдин арада иллаки машгьур хьанва ва абур сегьнедилай манидарри тамамарзава. Чна бажарагълу композитордин теснифар чи манидарри идалай кьулухъни сегьнедилай халкьдал агакьардайдак умуд кутазва.

Керимхан Бабаеван уьмуьрдин рекьихъ галаз­ мукьу­вай таниш жез кIанзавайбурувай Эдуард Ашу­рагъаеван «Керимхан Бабаев. Уьмуьр ва теснифат» (2019), «Да­­гъус­тандин композиторрин­ ­уьмуьрдинни теснифатрин куьруь гафарган» (2021) ва «Лезги макьаматдин чирагъар» (2022) ктаб­рикайни (абур пудни урус чIалал чапдай акъат­нава) шаир ва мухбир Мердали Жалилован «РикIел хкунар» («Лезги газет» 1999-йисан 2-сентябрь, № 35 ) ва «Бажарагърин кIватI тир» («Лезги газет» 2019-йисан 4-июль, № 27) макъалайрикай менфят къачуз жеда.    

Мурад Саидов

Гуьлжагьан

Гуьлжагьан, вун закай катиз,
Вахъ масабур гелкъвезвани?
Дуьзенрай физ, кIеве гьатиз,
Ви кьилел гар элкъвезвани?

Цифедкайни чир жеда вун,
Гъамлувилел заз тамашиз.
Зи рикIин экв, сир жеда вун,
Ви гъилериз, ваз тамашиз.

Зи тахсир лагь, вун кIан хьайи,
Зи бахт, садвал – вири вун я.
Лейли Межнун, ваз ван хьайи,
Масабур туш – вунни зун я.

Гагь далдайрикай тамашиз,
Им ашкъидин эсер яни?
Гагь вилерив зун тарашиз,
Муьгьуьббатдин гьиссер яни?

Са цIуд йисан яшар пара,
Вун фикирда кьун дуьз яни?
РикI зав рахаз, кьил тваз хура,
Икьван дамахун дуьз яни?

Бушлухра вун хьайитIани,
Ви гуьгъуьна гар жеда зун.
Венерадал фейитIани,
Ваз эбеди яр жеда зун.

Желил Мурадалиев