Гьажи Давудан тIварцIихъ галай фондунин тIалабуналди Дагъустандин кьуьлердайбурун пуд госансамблди чпин репертуардай лезги халкьдин кьуд кьуьл акъуднава.

Фондунин векилри РД-дин медениятдин министерстводиз рекье тунвай чарче «Лезгинка», «Каспий» ва «Дагестан» ансамблри тамамарза­вай лезги халкьдин кьуьлера ийизвай гьерекатар, кьуьлерзавайбуру алукI­навай парталар лезгийрихъ галаз са алакъани авачирбур тирди къейднавай ва абур, репертуардай акъудна, халис лезги кьуьлералди эвезун теклифнавай.

Министерстводи Дагъустандин халкьарин адетрин медениятдин мес­элайрин гъавурда авай пешекарар желбна, ихтилат физвай кьуьлериз къимет гана. Нетижада Гьажи Давудан тIварцIихъ галай фондунин векилар гьахълу хьана. РД-дин медениятдин министерстводи гьукуматдинбур тир «Лезгинка», «Каспий» ва «Дагестан» ансамблриз репертуаррай «Бутхуьр», «Юждаг», «Лезги кьуьл» ва «Ахцегьрин ичер» тIварар алай кьуьлер акъудун теклифна.

"Лезги газет"