22-далай 26-майдалди Азербайжан республикадин меркез Баку шегьерда 23 йисал къведалди яшара авайбурун арада Европадин кIвенкIвечивал патал азаддаказ кьуршахар кьунай акъажунра вичин ери-бине Ахцегьай тир чи ватанэгьли, Азербайжандин патай экъечIзавай Жабраил Гьажиева (74 кг-дин заланвал авайбурун арада) къизилдин медаль къазанмишна.
Ж. Гьажиева и акъажунра вири санлай 4 бягьс кьиле тухвана. Финалда адаз Россиядин хкянавай командадик кваз иштиракзавай Камил Абдулвагьабов кумукьна.
РикIел хкин, Ж. Гьажиева виликан йисара 21 йисал къведалди яшара авайбурун арада дуьньядин ва Европадин чемпионатрани гъалибвилер къазанмишнай.
***
И йикъара Бакуда грэпплингдайни Европадин кIвенкIвечивал патал итимрин арада акъажунар кьиле фена. Анани дуьньядин хейлин уьлквейрай тир викIегь спортсменри гьасиррал чпин устадвал къалурна. Россиядин лайихлу тренер Мурад Абдуллаеван регьбервилик кваз чи уьлкведин хкянавай командади акъажунрин сифтегьан юкъуз къазанмишиз хьун мумкин тир 14-дакай 12 медаль къазанмишна.
И агалкьуник дагъустанвийрин чIехи пай ква. Мадни шад жедай кар ам я хьи, и юкъуз чи пуд ватанэгьлидини медалар къазанмишна. ИкI, 66 кг-дал къведалди заланвал авайбурун арада чпин ери-бине Ахцегь райондин Фиярин хуьряй тир, Махачкъалада са клубда чпин устадвал хкажзавай Гьабиб Атлуеваз ва Артур Агъашириноваз финалда чеб чпихъ галаз «гуьруьшмиш» хьун кьисмет хьана. Нетижада Гьабиб Атлуева — къизилдин, Артур Агъаширинова гимишдин медалар къазанмишна.
Россиядин хкянавай командадик Новосибирскдин патай экъечIнавай Мегьамед Шагьбанова 62 кг-дал къведалди заланвал авайбурун арада 1-чка кьуна.
Рагнеда Рамалданова
