Вичик еке умудар кутунвай спортсменрикай мадни сад ери-бине Кьурагь райондин Кьуьчхуьрай тир белижви Шамил Мамедова алатай йисан эхирра кьабулнавай къарардикай — Болгариядин патай экъечIуникай — газетда хабар гуз чун гьеле агакьнавачир. ИкI, 20-январдиз Сливен шегьерда азаддаказ кьуршахар кьунай кьиле фейи Болгариядин чемпионатда 65 килограммдин заланвал авайбурун арада чи кьегьалди 1-чка кьуна. Кьилиндини ам я хьи, Шамил Мамедова Европадин чемпионатдиз путёвка къазанмишна.
Болгарияда вичин сифтегьан акъажунра Шамил Мамедова гьасиррал виниз тир устадвал къалурна. Чемпионатдин вад бягьс чи ватанэгьлиди, санлай къачурла, 52:1 гьисабдалди акьалтIарна. Финалда Ш. Мамедоваз И. Куртев 10:0 гьисабдалди кумукьна. ЧIехи пай бягьсер ада вахт амаз акьалтIарна. Гила ада мартдин эхирра Албаниядин Тирана шегьерда кьиле фидай Европадин чемпионатдиз гьазурвилер аквада.
РикIел хкин: Ш. Мамедов международный классдин спортдин мастер, жаванрин арада Россиядин ва дуьньядин чемпионатрин, международный хейлин турниррин гъалибчи я.
Рагнеда Рамалданова
