Дагъустандин чилел сифте сеферда яз кьиле фейи кьуршахар кьунай Европадин чемпионат чи уьлкве патал, республика патал агалкьунралди куьтягь хьана. Къейд ийин, 27-апрелдилай давам хьайи акъажунрин нетижаяр 6-майдиз кьуна.

Дагъларин уьлкведин Каспийск шегьерда кьиле фейи чемпионатдин нетижада Россиядин хкягъай дестеди 8 медаль къазанмишна. Абурукай 6 медаль  — къизилдинбур, 2 медаль гимишдинбур я.

Кьилди къачуртlа, Европадин чемпионар Гьажимурад Рашидовакай (61 кг), Мегьамед Къурбаналиевакай (70 кг), Агьмед Гьажимегьамедовакай (79 кг), Артур Найфоновакай (86 кг), Абдурашид Садулаевакай (92 кг) ва Владислав Байцаевакай (97 кг) хьана.

Гимишдин медалар Завур Угуева (57 кг) ва Ильяс Бекбулатова (65 кг) къазанмишна.

Къейд ийин, дестейрин жергеда кьвед лагьай чка Азербайжандин хкягъай дестеди ва пуд лагьай чкани Туьркиядин хкягъай дестеди кьуна.

«Лезги газет»