МФЦ-дин идарайра етим аялриз кIвалер къачудай сертификатар къачун патал арзаяр кьабулиз башламишнава. Пешекарри хабар гайивал, арзачияр етимвилин дережа авай ва диде-бубадин къаюмвилик кумачир аялар, гьакIни и жергедик акатзавай, чпин 23 йис яш тамам хьанвай, яшамиш жедай кIвалералди таъминаруниз талукь официальный сиягьдик кутунвай Россиядин ватандашар хьун лазим я.
Пулунин такьатар са сеферда гузва ва абур яшамиш жедай къулайвилер авай чка маса къачуниз, гьакIни яшайишдин кредит (ипотекадай) тамамдиз вахкуниз серф ийиз жеда.
Арзачидив хьана кIанзавай документар ихьтинбур я:
– РФ-дин ватандашдин паспорт;
– мукьвавилин алакъаяр тестикьарзавай документар (хизан аваз хьайитIа);
– наркологиядин ва психоневрологиядин диспансеррай справкаяр;
– дидевилин (хизандин) капитал къачунин ихтияр авайбурун федеральный регистрдай выписка (герек жез хьайитIа);
– такьатар къачузвайдан СНИЛС;
– хизанда авай ксарикай делилар;
– СВО-да иштиракзаватIа, и кар тестикьарзавай документар.
Арзаяр Дагъустанда кардик квай МФЦ-дин вири идарайри 1-мартдилай 1-апрелдалди кьабулзава ва абуруз вацран муддатда килигзава. И къуллугъ МФЦ-ди гьавая кьилиз акъудзава. Суалар аваз хьайитIа, и нумрадиз зенг ая: 666-999.
«Лезги газет»
