Еке къимет гана
Дагъустандин регьбер Фёдор Щукина ДГТУ-дин ректор Назим Баламирзоевахъ галаз 2024-йисуз вузда ачухнавай военный рекьяй чирвилер гузвай центрадин кIвалах вилик тухуниз талукьарнавай месэлаяр веревирдна.
Алай вахтунда центрада вуздин жуьреба-жуьре факультетра кIелзавай 200-дав агакьна студентри чирвилер къачузва. Центр махсус классралди, герек техникадалди, пешекарралди тамамдиз таъмин я. Проект Россиядин оборонадин ва илимдинни кьилин образованидин министерствойрин куьмекдалди кьилиз акъудзава.
Центрадиз къвезвай студентриз яракь ишлемишдай, жува-жув дяведин гьерекатра тухудай къайдаяр, БПЛА-яр идара ийиз чирзава. Центрада абуруз ватанпересвилин рекьяй тербия гунин месэлани кар алай месэлайрикай сад яз гьисабзава ва и жигьетдай еке кIвалах кьиле тухузва.
Фёдор Щукина центрадин кIвалахдиз еке къимет гана ва вуздиз мугьман хьунин жигьетдай ректорди гайи теклиф кьабулна.