Абу-Дабида рахунар

10-11-ноябрдиз ОАЭ-да Украинада къалмакъал секинарунин патахъай пуд терефдин – Россиядин, Украинадин ва США-дин – арада рахунар кьиле фена. Идакай «РИА Новости» чешмеди хабар гузва.

РФ-дин Президентдин куьмекчи Владимир Мединский кьиле авай чи уьлкведин делегациядик МИД-дин кьилин заместителар тир Михаил Газулин ва Сергей Рябков, ФСБ-дин векил Алексей Комков ва РФ-дин ВС-дин Генштабдин кьилин управленидин начальник Игорь Костюков, абурулай гъейри, пешекаррин дестедик Генштабдин, ФСБ-дин, Президентдин Администрациядин ва МИД-дин мад ругуд векил квай.

Сад лагьай юкъуз, 10-ноябрдиз, рахунар саки кьуд сятда давам хьана. Рахунрин эвел кьиляй Владимир Мединскийди гуьруьшди къалмакъал ислягьвилелди секинарунихъ тухуник умуд кутуна. США-дин президентдин махсус илчи Стив Уиткоффа, гуьруьш башламиш жедалди, Украинадинни Европадин векилрихъ галаз гележегда Европадин хатасузвилин гьакъиндай веревирдер авуна.

США-дин госсекретарь Марко Рубиоди рахунрин сад лагьай югъ бегьерлуди хьайиди ва вилик гзаф кIвалах кумайди лагьана. Къейд ийин, США-дин патай Д. Трампан махсус илчи Жаред Кушнера ва Европада НАТО-дин къуватрин главком Алексус Гринкевича иштиракна.

Украинадин делегациядик къецепатан разведкадин къуллугъдин кьил Р. Умеров, В. Зеленскийдин офисдин регьбер      К. Буданов (Россияда террористрин ва экстремистрин сиягьдик кутунва), адан заместитель С. Кислица, Рададин векил Д. Арахамия, оборонадин министерстводин ГУР-дин начальникдин заместитель В. Скибицкий ва ВСУ-дин генштабдин виликан кьил А. Гнатов квай. 

Гьелягьар кьазва

Германиядин канцлер Фридрих Мерца, эгер Евросоюздин­ кьилдин иштиракчийри Украинадиз такьатар гуникай кьил къакъудайтIа, блокдин 2028-2034-йисарин бюджет акъвазарда лагьана къурхуяр гана. Адан гафар «РИА Новости» чешмеди раижна.

«Эгер ЕС-дин членри-уьлквейри Украинадиз пулунин жигьетдай куьмекар гунин мажбурнамаяр чпин хивез къачун та­вуртIа, Мерца ирид йисан бюджет кIевда лагьана тагькимарнава», – кхьенва Европадин советдин председатель А. Коштеди.

«Financial Times» газетдин делилралди, Мерцан фикир Дуб­линда Европадин регьберрин гуьруьш кьиле фидалди вилик малум хьана. Канцлердиз кьиле фидай гуьруьшдал Киевдиз пулунин такьатар акъакь тавунин месэла гьялунал кIевивал ийиз­ кIанзава. Гьа са вахтунда Киевдин «иштагьар» мадни гзаф ахъа жезва. 

Чешмеди Венгрияди, Словакияди, Болгарияди ва Чехияди гележегда Киевдиз куьмек гуникай кьил къакъуднавайдакай хабар гузва.

Еврокомиссияди идалай вилик ЕС-дин саки 2 триллион евродикай ибарат 2028-2034-йисарин бюджетдин проект малумарнай. Ана оборонадиз ийизвай харжияр артухарун ва Украинадиз куьмек гун фикирда кьунва. Ихьтин теклифри Евросоюздин уьлквейрин арада наразивилер, гьар жуьредин фикирар арадал гъана.

Россияди са шумудра малумарна хьи, РагъакIидай пата пулуналдини яракьралди Украинадиз куьмек гун давам хьуни къалмакъал яргъал вегьеда ва ам меслятвилелди, дипломатвилин рекьелди акъвазаруниз манийвал гуда.

Россия рази жедач

Россия Украинадин къалмакъал вахтуналди акъвазарунал рази жедач. «ТАСС» чешмеди хабар гузвайвал, ихьтин фикир ООН-да РФ-дин гьамишан векил Василий Небензяди малу­марна.

«Чун къалмакъал вахтуналди акъвазарунал рази жедач, ида чи хатасузвал патал авазвай къурхуяр хуьдай мумкинвал гуда ва гьалар цIийи кьилелай къизгъин хъхьунин шартIар арадал гъида», – къейдна ада.

Дипломатдин гафаралди, Украинадин къалмакъал тамамдиз секинарун ва адан эвелимжи себебар арадай акъудун лазим я. И месэлаяр гьял тавунмаз, Небензяди къейд авурвал, гьич са жуьредин меслятрини дурумлу ислягьвал таъминар­дач­. 

Гьар юкъуз тIалабзава

Израилдин премьер-министр Б. Нетаньяхуди США-дин през­идент Дональд Трампавай Ирандихъ галаз къалмакъал давамар хъувун патал гьар юкъуз тIалабзава. Ихьтин фикир «Financial Times» газетди раижнава.

«Нетаньяхуди Трампаз гьар юкъуз зенгзава ва дяве давамар хъувун тIалабзава», – лагьанва вичин тIвар малумар тавунвай дипломатди.

Июндиз США-дини Иранди ислягьвал хуьниз талукь меморандумдал къулар чIугунай, амма пуд гьафтедилай мад сада-садаз ягъунар кьуна.

"Лезги газет"