Къалмакъал куьтягьиз кIанзавач

Ослода  В. Зеленскийдихъ  ва  Украинадинни  Евросоюз­дин дестейрихъ галаз гуьруьшмиш хьайидалай кьулухъ США-дин президентдин махсус илчи Стивен Уиткоффаз тайин­ ­фикирар РФ-дин Президент Владимир Путинал агакьар­дай ният ава. Идакай «Axios» порталдин журналист Б. Равида кхьизва.

«Ослодилай кьулухъ Уиткоффаз Россиядиз физ кIанзава. Ина ада Путинахъ галаз гуьруьш кьиле тухуник ва Украинадинни Европадин амадагрихъ галаз санал веревирд авур фикирар адаз ачухуник умуд кутазва», – кхьенва журналистди «Х» соцсетда. 

Къейд ийин, Трампа эхиримжи йикъара Зеленский меземмет ийизва. И йикъара ада Киевдин режимдин кьилик Россиядихъ галаз авай къалмакъал акьалтIариз кIан тийизвайвиляй тахсир кутуна. Идалайни гъейри, Трампа Украинадиз Москвадихъ галаз икьрардал къвез жедай цIийи регьбер герек тирди къейднай. 

Махсус серенжемдикай

РФ-дин оборонадин министерстводи 17-октябрдиз малумарай делилралди, чи кьушунрин «РагъэкъечIдай пад» дестеди Днепропетровскдин областдин Великомихайловка хуьр гуьзчивилик кутуна. Женгерин вахтунда Днепропетровскдин областдин Маломихайловка, Коломийцы, Запорожьедин областдин Вольнянка, Терсянка ва Ясная Поляна хуьрерин мулкара ВСУ-дин десантникринни гьужумчийрин, аэромобильный бригадайрин, гьужумчийрин полкунин къуватриз ва техникадиз бегьем ягъунар кьуна. 

Россиядин оборонадин министерстводи 17-октябрдиз малумарай делилралди, дяведин махсус серенжем кьиле тухунив эгечIайдалай инихъ Россиядин Яракьлу Къуватри Украинадин 674 самолет ва 284 вертолет, зенитдин ракетайрин 672 комплекс, пилот галачиз лув гудай 263 889 аппарат, 31 269 танк ва дяведин маса машинар, РСЗО-дин 1790 машин, артиллериядин ва маса 36 745 яракь, военный махсус 74 762 автомашин тергна.

Францияда чалпачух

Сентябрдин юкьварилай Франциядин мектебрин чIехи клас­сра кIелзавайбур мектебрин гьаларилай наразивилер къалурун патал тилит-тилит куьчейрал экъечIна. Жегьилри гьукумдарривай мектебрин гьалар хъсанарун истемишзава. Идакай «РИА Новости» чешмеди хабар гузва.

Гуьгъуьнлай жегьилрин жергейрик уьлкведа къиметар хкаж хьунилай наразивалзавай ватандашарни экечIна. Ихьтин гьалар неинки Париждин къваларив, гьакI маса регионрани къизгъин хьана.

17-октябрдиз кьиле фейи аксивилер виридалайни екебур хьана. Чкадин къайдаяр хуьдай органрин къурулушдин делилралди, ана 550 агъзурдалай гзаф агьалийри иштиракна. Чалпачух гьалар авай вахтунда мародерри туьквенар тарашна, дезгеяр барбатIна ва метягьар тухвана. Ихьтин алаш-булашвилер иллаки Париждани Марселда давам хьана.

Уьлкведин минюстдин кьил Ж. Дарманенан гафаралди, къайдасузвилерилай кьулухъ 2 агъзурни 500-далай виниз ксар полициядин къуллугъчийри кьуна.

Оппозициядин сиясатчи Ж. Барделлан фикирдалди, вилик-кьилик квайбурувай уьлкведа хатасузвал таъминариз хьанвач. «Эгер наразивилерин серенжемар кIевибур жезватIа, агьалийри шегьердин къурулушар барбатIзаватIа, им садани абурун вилик пад кьазвач лагьай чIал я; гьакъикъатда чпи чеб къуллугърал тайинарнавай гьукумдарри и кардиз са таъсирни ийизвач лагьай чIал я», – лагьана ада.

Къейд ийин, са шумуд гьафте идалай вилик «Tribune Dimanche» чешмеди Франциядин президент Э. Макронан дережа хейлин агъуз аватайдакай хабар ганай. Малум хьайивал, 2017-йисалай президентдин къуллугъдал алай Макроналай ватандашри и жуьреда садрани наразивал къалурначир. Хабарар кьунин серенжемда иштиракайбурукай 81 процентди уьл­кведин регьбердиз нагьакьан къимет гана.

Медведеван жаваб

РФ-дин хатасузвилин советдин председателдин заместитель Дмитрий Медведева США-ди Россиядиз акси яз кардик кутунвай санкцийриз немсерин философ Фридрих Ницшедин гафаралди жаваб гана.

Къейд ийин, США-дин регьбер Д. Трампа 19-сентябрдиз Россиядиз акси цIийи санкцияр кардик кутадай мумкинвал гузвай къанун акъуднай. Гуьгъуьнлай ада, цIийи къанунди ихтияр гузвайтIани, Россиядин чиновникриз, банкариз ва тешкилат­риз акси санкцийрик кьил кутун тавунин патахъай махсус къарар акъуднай.

«Санкцийрикай рахайтIа… Кьуьзуь Ницшеди лагьайвал, «куь зун рекьизватIа, гьада зун къуватлуни ийизва», – кхьена Медведева «Максда» авай вичин каналда.

"ЛГ"