ВСУ-дин тахсиркарвилер
Россиядин МИД-дин векил Р. Мирошника къейднавайвал, алатай гьафтеда Москвадал ва Подмосковьедал ВСУ-ди беспилотникралди гегьенш гьужумар авуна. Идакай ада «ТАСС» чешмедиз ихтилатна.
«Меркездиз мукьва мулкара ПВО-дин такьатралди 194 дрон кьуна ва тергна», – тестикьарна Мирошника.
Адан гафаралди, гьафтеда авур гьужумрин нетижада Москвадин регионда ислягь 23 агьалидиз хасаратвилер хьана. Раменское шегьердин округда, беспилотник себеб яз, цIай кьун арадал атуникди 8 йисан яшда авай руш телеф хьана. Котельники шегьерда 10 касдал хирер хьана, гьа жергедай яз – пуд йиса авай аялдални.
Дипломатди къейд авурвал, Москвадин областдин Жуковский шегьерда беспилотник гзаф мертебайрикай ибарат кIвалел аватна. «Сигъдиз инсанар яшамиш жезвай чIехи шегьердиз ягъунар кьун ислягь агьалийриз акси яз теракт авунин военный тахсиркарвал я», – лагьана ада.
Чешмеди алава хъийизвайвал, 22-июндиз ВСУ-ди Подмосковьеда авай «Дубна» ЦКС-диз (Центр космической связи) ягъунар кьуна.
Негь авуниз эвер гана
РФ-дин Хатасузвилин советдин секретарь С. Шойгуди Индияда БРИКС-дин уьлквейрин вилик-кьилик квай векилрин гуьруьшдал къейд авурвал, Украинадани Европада кьиле физвай гьерекатри экстремизмдиз, гужар авуниз рекьер ачухзава.
Совбездин секретарди миллетбазвилел чан хкунин ва миллетбазвилин тахсиркарвилер игитвилериз барабар авунин жигьетдай ийизвай алахъунрин вилик пад атIун умуми везифа яз гьисабун лазим тирди къейдна.
Шойгуди гуьруьш лишанлу юкъуз кьиле физвайдал фикир желбна: 22-июндиз Германиядин миллетбазри, фашистри хиянаткарвилелди Советрин Союздал гьужум авурдалай инихъ 85 йис тамам хьанва.
ЦIийи меслятар
Швейцарияда кьиле фейи рахунрин нетижада Иранни США кIвалахдай кьуд десте арадал гъунин икьрардал атана. «Press TV» чешмеди кхьизвайвал, идакай Ирандин МИД-дин кьилин заместитель К. Гарибабадиди ихтилатнава.
«КIвалахдай кьуд махсус десте арадал гъанва: санкцияр акъвазарунин рекьяй кIвалахдай десте, ядерный месэлайриз талукь яз кIвалахдай десте, экономикадин рекьяй еримлу ийидай крарал машгъул жедай десте ва месэлаяр гьялунал гуьзчивал тухудай десте», – хабар гузва чешмеди.
Идалайни гъейри, Ормуздин проливдай гимияр хатасузвилелди фин таъминарунин макьсаддалди Тегеранни Вашингтон меморандумдин иштиракчияр патал алакъадин центр арадал гъунин жигьетдай меслят хьана.
Ливан патал къалмакъал секинардай дестени тешкилнава. Гарибабадиди къейдзавайвал, уьлквейрин векилри вини дережада нубатдин рахунар давамар хъувуниз гьазурвал акунва. Ана Ирандин парламентдин спикер Могьаммад-Багер Галибафа, Ирандин МИД-дин кьил Аббас Аракчиди, США-дин вице-премьер Жей Ди Вэнса, гьакIни Пакистандинни Катардин премьер-министрар тир Шегьбаз Шарифани шейх Мугьаммад бен Абдеррагьман Аль Таниди иштиракдайвал я.
Идалай вилик Вэнса кьиле фейи рахунриз разивилин къимет ганай. Адан гафаралди, икьрар кутIунунин патахъай терефар меслятдал атанва.
Кореяди тахсир кутазва
США-дин гьерекатар, Ближний Востокдин гьалар себеб яз, КНДР-дин регьбер Ким Чен Ына ядерный жигьетдай мумкинвилер гегьеншардай фикир авайдакай малумарнава. Адан гафар ЦТАК-ди (Центральное телеграфное агентство Кореи) раижнава.
Ким Чена США-дикни Кьиблепатан Кореядик Коерядин полуостровда военный вердишвилерин серенжемар, разведкадин кIвалахар себеб яз, гьалар къизгъинарунай тахсир кутазва.
Къалмакъалдик кутаз кIанзава
Дяведин гьерекатар кьиле физвай мулкар гегьеншаруналди, Киевди Белоруссия Россиядинни Украинадин арада авай къалмакъалдик кутунин алахъунар ийизва. «РИА Новости» чешмеди хабар гузвайвал, ихьтин фикир РФ-дин МИД-дин кьил Сергей Лаврова лагьанва.
«Лезги газет»
