Махсус серенжемдикай
Россиядин кьушунрин «РагъэкъечIдай пад» дестеди Днепропетровскдин ва Запорожьедин областра ВСУ-диз бегьем ягъунар кьуна. Нетижада 315-далай гзаф боевикар, гьакIни мидядин 5 автомобиль, артиллериядин пуд яракь тергна. Идакай 4-майдиз РФ-дин оборонадин министерстводи хабар гана.
Украинадин терефди Россиядин регионрихъ дронар ахъаюнин гьерекатар давамарзава. 5-майдиз «РИА Новости» чешмеди хабар гайивал, мидяди ахъаяй 289 беспилотник Россиядин ПВО-дин такьатри яна. Кьилди къачуртIа, самолетдин жуьредин БПЛА-яр Брянскдин, Белгороддин, Воронеждин, Курскдин, Калугадин, Смоленскдин, Орелдин, Твердин, Туладин, Рязандин, Псковдин, Новгороддин, Ленинграддин, Ростовдин, Волгограддин областрал, Москвадиз мукьва мулкарал, Крым, Татарстан республикайрал, Краснодардин крайдал ва Азовдин гьуьлел кьуна ва тергна.
4-майдиз РФ-дин оборонадин министерстводи малумарай делилралди, СВО кьиле тухунив эгечIайдалай инихъ Россиядин Яракьлу Къуватри Украинадин 671 самолет ва 284 вертолет, зенитный ракетайрин 658 комплекс, пилот галачиз лув гудай 141646 аппарат, 29161 танк ва дяведин маса машинар, РСЗО-дин 1714 машин, артиллериядин ва маса 34749 яракь, военный махсус 60777 автомашин тергна.
Хиве кьуна
Киев мулкарикай магьрум хьун давам жезва. Ихьтин фикир США-дин президент Дональд Трампа «Salem News» телеканалдиз гайи интервьюда лагьана. Гьа са вахтунда ада къейдзавайвал, Украинадин кьушунар США-ди европавийрин пулунихъ НАТО-диз маса гузвай яракьрин куьмекдалди женгинин гьерекатар давамардай гьалда авазва.
Трампа Зеленский фендигар тирди малумарна ва, алава хъувурвал, США-ди къалмакъал акъвазарунин рекье алахъунар ийизва.
«The New York Times» газетда къейднавайвал, эхиримжи вахтара Зеленскийди Вашингтон гзаф критика ийизва. Москвадихъ галаз икьрар кутIундай ашкъи авач лугьуз, Трампа адаз са шумудра туьгьметар авуна.
Финляндиядинни Эстониядин истемишун
Финляндиядини Эстонияди Киевдивай чпин мулкарал дронар, абурун кIусар аватунин агьвалатар михьиз арадай акъудун истемишзава. Идакай «РИА Новости» чешмеди хабар гана.
«Ихьтин серенжемар патал чи цавун бушлухар ишлемишун къадагъа ийизва. КIевелай къадагъа ийизва. Чна Украинадин гьукуматдиз идан патахъай хъсандиз малумарнава. Гьатта «рехъ алатай» дронарни чи терефра пайда хьун кьабулиз жедай кар туш», – лагьанва Финляндиядин оборонадин министр А. Хяккянена. Ада гележегда ихьтин агьвалатриз рехъ гун тавун истемишна.
Эстониядин премьер-министр К. Михални гьа ихьтин фикирдал ала. «Чи тIалабун ихьтинди я: женгерин гьерекатрин нетижада дронрин кIусар чи терефрихъ акъатун дуьз туш», – лагьана ада.
Финляндиядилайни Эстониядилай гъейри, ВСУ-дин дронар Латвиядин ва Литвадин мулкарихъни акъатна. Москвади Прибалтикадин уьлквеяр абуру цавун бушлухар ишлемишунин ихтияр гунихъ галаз алакъалу яз махсусдаказ тагькимарнай. Таллиндин гьукумдарри чпи ихтияр ганвайди туш лагьана тестикьарнай.
Аскерар кьена кIанзавач
Колумбиядай са шумуд агъзур аскерди пулунихъ ВСУ-дин жергейра аваз женгера иштиракзава. «РИА Новости» чешмеди хабар гузвайвал, идакай тIвар кьунвай уьлкведин президент Г. Петроди ихтилатна. «Колумбиядин ирид агъзур аскерди чарадан дяведа иштиракзава ва Украинада рекьизва. Чаз ихьтин кьиникьрин серенжемар герек туш», – кхьенва ада «Х» соцсетда.
Ада рикIел хкайвал, гьакъидихъ маса уьлкведа дяведин гьерекатра иштиракун Колумбияда къанундалди къадагъа авунва.
Евросоюз ва Эрменистан
Ереванда кьиле фейи сад лагьай саммитдин нетижада Евросоюз Эрменистандихъ галаз са жерге месэлайрин патахъай икьрардал атанва. Кьилди къачуртIа, Евросоюзди Эрменистандин экономика патал 2,5 миллиард евро инвестиция авун ва визайрин режим зайифарун кьетIнава.
«ЕС-ди Эрменистандихъ галаз гележегда алакъаяр мягькемарунин ва анин аслу туширвилин тереф хуьнин месэладиз кIевелай фикир гуда», – кхьенва документда.
Къейдзавайвал, Эрменистанди Евросоюздин патай куьмек хушдиз кьабулзава. ЕС-ди гьакIни Эрменистандихъ галаз хатасузвилин, оборонадин месэлайрин патахъай саналди кIвалахунин къаст авайди тестикьарнава.
«Лезги газет»
