Россиядин илимдин ва кьилин образованидин министерстводи 2026-йисуз вузрик экечIун патал лазим тир ЕГЭ-дин агъа кIанин баллрин кьадар тайинарнава. Идаз талукь буйругъ министерстводи алатай йисан эхиррай чапна.
Адан бинедаллаз, алай йисуз вузрик экечIун патал лазим агъа кIанин баллрин кьадар ругуд предметдай хкажнава: урус чIалай, пешедиз герек тир дережадин математикадай, тарихдай, къецепатан чIалай, литературадай, биологиядай, географиядай ва химиядай. Гила абурай, гьич тахьайтIа 40 баллдин къимет аваз хьун чарасуз я. Амай тарсар патал агъа кIанин баллрин кьадар гьардаз кьилди къалурнава: физикадай – 41 балл (икьван чIавалди 39 тир) обществознанидай – 45 балл, информатикадай – 46 балл (икьван чIавалди – 44).
Тикрар хъийин, 2026-йисуз вузрик экечIун фикирда кьунвай абитуриентрин агалкьунар и сергьятрилай агъузбур хьун лазим туш.
ГьакIни, алай йисалай башламишна, вуздик экечIун патал документар мад образованидин идарадин информациядин системадин куьмекдалди агакьардай ихтияр амач. Къейдзавайвал, абур мукьвал-мукьвал кардикай хкатзавай, я тахьайтIа, арзаяр гзаф хьун себеб яз, лап явашдиз кIвалахзавай. Гила документар вугудай анжах пуд рехъ ава: вуздиз фена, кьабулдай комиссиядив гъиляй-гъилиз вугун, Госкъуллугърин сайтдин куьмекдалди ва я почтадай агакьарун.
Мад са дегишвал – 2026-йисалай вузда тайин макьсаддиз (целевой) чкаяр чара ийидайла, заказчикар, кIелдай къайда ва образованидин программа тайиндаказ къалурда. ИкI, кIвалахдалди таъминарзавайбуруз хсуси «кадрийрин резерв» жеда.
Жасмина Саидова
