ЦIийи улакьар

30-августдилай Махачкъала — Кас­пийск маршрутда цIийи автобусри кIвала­хиз эгечI­на.  Алай девирдин и улакьар ахтармишунин режимда аваз гьалун агалкьун­ралди кьиле фенва. Идакай РД-дин транс­­портдин ва рекьерин майишатдин ми­­нис­терстводин телеграм-каналди раиж­зава.

Махачкъала — Каспийск маршрут кье­тIен метлеб авайди я, гьикI хьи, адан къул­лугъдикай активнидаказ пенсионерри­, чпин гьерекат сергьятламиш тир (маломобильный) агьалийри… менфят къачузва.

Чешмеди къейдзавайвал, и рекье улакьрин такьатар артухарун РД-дин транспортдин ва рекьерин майишатдин­ министерство патал эвелимжи чкадал алай месэла я. Ведомстводи юкьван клас­сдин чпе 75 кас кьван гьакьдай 10 автобус (Ситимакс-9) къачунва.

ЦIийи автобусар кардик кутуни и рекье улакьрин гьерекат ва агьалийриз ийиз­вай къуллугърин ери хейлин хъсанарда.

Автобусри кIвалахунин график ихьтинди я: экуьнин сятдин 7-дан зуралай йифен сятдин 10-дал кьван (6:30 — 22:00), арада 10 декьикьа аваз. Маршрут «Дагдизель» (Каспийск) заводдилай башламиш жезва — «Каспийская» (Махачкъала) остановкадал кьван. Къимет — 40 манат.

Ичерин бегьер

Республикада емишар кIватI хъувунин кIвалахдик гьерекат акатнава. Идакай РГВК-дин телеграм-каналди раижза­ва. Къейдзавайвал, аграрийри 200 гек­тар­дай гьеле 20 агъзур тонндилай гзаф ичер кIватI хъувунва. Са гектардай бе­гьерлувал­ 100 центнердилай алатнава. Дагъустанди вичин ичин багъларалди гьахълудаказ дамахзава. Регионда зурба инвестпроектар уьмуьрдиз кечирмишзава. И ре­кьяй СтIал Сулейманан районда «Полоса»­, Дербент районда — «Анжелика», Мегьа­рамдхуьруьн районда КФХ «Багъ» кIвен­кIвечияр я.

Хабар гузвайвал, Дагъустанда гьа­сил­завай машгьур сортар ибур я: «айда­ред», «голден делишес», «гала» ва «ренет симиренко». Чешмеди гъизвай де­лил­ралди­, алатай йисуз, санлай къачурла, кIватI хъувур ичерин кьадар 90 агъзур тонндив агакьна, гектардай — 108 центнер гуналди. ЦIи Дагъустандин аграрийри и рекъемдилай алудун патал чалишмишвилер ийизва.

РД-дин хуьруьн майшатдин ва недай суьрсетдин министерстводин телеграм-каналди хабар гузвайвал, 2024-йисан эхирра Дагъустанда ичерин багъларин майдан 9,8 агъзур гектар кьунвай, идакай 8,4 агъзур гектар — бегьер гузвайбур. Шаз, санлай къачурла, 91,4 агъзур тонн кIватIна, гектардай — 108,8 центнер.

Гьазур жезва

Махачкъала автопарк екедаказ цIийи хъувуниз гьазур жезва. Идакай Махачкъала шегьердин кьилин везифаяр вахтуналди тамамарзавайди тир Жамбулат Салавова хабар гана.

Кьилди къачуртIа, чешмеди къейдза­вайвал, Махачкъала общественный транс­­портда бегьем дегишвилериз гьазур жезва. ИкI, 2026-йисан январдилай шегьердин маршрутриз «Уьумуьр патал инфраструктура» милли проектдин сергьятра аваз къачунвай алай девирдин 84 автобус экъечIда. И проект шегьердин улакьрин сеть цIийи къайдада туьхкIуьрунин рекье важиблу кам хьун гуьзетзава.

ЦIийи автопарк жуьреба-жуьре классрин автобусрикай ибарат жеда: 11 — еке классдин, 57 — юкьван классдин, 16 — гъве­чIи классдин.

Хатасузвилин къайдаяр

РД-дин энергетикадин ва тарифрин­ ми­нистерстводи, газ яшайишдин шартIар патал ишлемишдайла, хатасузвилин къайдаяр вилив хуьн лазим тирди рикIел гъизва. Идакай и ведомстводин телеграм-ка­налди раижзава.

Кьилин къайдаяр ибур я:

— кIвалахзавай газдин тадаракар гуьзчивилик квачиз тамир;

— газдин алат (оборудование) кардик кутадалди гурмагъди гум чIугвазвани —  авачни чира;

— дараматда датIана гьава къекъуьн таъминара;

— газдин такьат жува-жуваз ремонтдай, эцигдай ва дегишардай ихтияр авач.

Малуматда, газдин ни акъатайла, агьалийри вуч авун лазим ятIа, гьадакайни раижзава:

— газдин приборар ишлемишун тади гьалда акъвазара;

— газ къвезвай турба агала;

— газдин ни гьатнавай кIвале ва я дараматда электротакьатар ва ачух цIай ишлемишмир;

— дараматда гьава къекъведайвал ая;

— тади гьалда дараматдай экъечI ва газдин аварийный къуллугъдиз и нумрадай эвера — 104 (мобильный телефондай).

Вахт акадар тийиз, пешекарвилин тешкилатрин къуватралди технический жигьетдай къуллугъ авунин серенжемар кьиле твах.

Гьазурайди — Муса  Агьмедов