РФ-дин просвещенидин министерстводи тестикьарай къарардалди алай йисан 1-сентябрдилай уьлкведин мектебра яваш-яваш «Россиядин руьгьдинни марифатдин культура» цIийи тарс кардик кутунин кIвалах башламишда. КIелунин 2026/2027-йисуз ам анжах 5-классра гудайвал я. 6 ва 7-классра кIелзавай аялар патал ам кIелунин 2027/2028-йисан программадик кутада. И тарсуни, гьисабзавайвал, мектебра кIелзавай аялриз государстводин ва жемиятдин крар ийизвай зурба пешекаррин агалкьунрикай ва лайихлувилерикай чирда. Министерстводин векилди гьакIни хабар гузвайвал, 4-классра кIелзавай аялар патал программада чарасузди тир «Динрин культурайрин ва светский эдебдин бинеяр» тарс фикирда кьунва. И тарсара муаллимар аялрихъ галаз, гьа гьисабдай яз, гзаф миллетрикай ибарат тир Россиядин халкьарин адетриз гьуьрмет авуникай рахазва.
Лагьана кIанда хьи, «Россиядин руьгьдинни марифатдин культура» тарсунин программа икьван чIавалди авай «Россиядин халкьарин руьгьдинни марифатдин бинеяр» тарсунин бинедаллаз туькIуьрзава. Чирвилер гунин программадин расписанида цIийи тарсуниз чка хьун патал къецепатан чIаларин сятерин кьадар тIимиларда.
«Къейд авун важиблу я, 8-9-классра къецепатан чIаларин сятерин кьадар авайвал амукьда – гьафтеда пуд тарс, сифтегьан школадани виликдай авайвал амукьда – пуд тарс. Куьруь ийидайди 5-7-классра авай сятерин кьадар я – 3 сятдин чкадал гила 2 сят жеда», — малумарна РД-дин образованидин ва илимдин министр Ягья Бучаева.
Къецепатан чIалар дериндай чириз кIандайбур патал ихьтин мумкинвал мектебра авай профильный классрин сергьятра аваз ачухда. Ихьтин классра аялривай кьилди къачур тарсар дериндай, яни вини дережада аваз чириз жеда.
Саида Мурадова
