Алай йисалай Дагъустанда жува жув кIвалахдалди таъминарзавай (самозанятый) ксар гуьгьуьллудаказ страховатуниз талукь яз цIийи ахтармишун (программа) кардик акатнава.
ИкI, Россиядин Яшайишдин фондунин Дагъустанда авай отделенидин пресс-къуллугъдин малуматрал асаслу яз, алай йисалай, яни и эксперимент башламишайдалай кьулухъ, чи республикада жува жув кIвалахдалди таъминарзавай 40-далай виниз ксари ана иштирак авуналди, яни азарлу хьайи вахтунда «больничныйрай» пул къачун патал электронный къайдада арзаяр ганва. Идалди жува жув кIвалахдалди таъминарзавай ксари азарлу хьайи дуьшуьшда гьукуматдин патай куьмек агакьарунихъ, яни яшайишдин рекьяй хуьнихъ элкъуьрнавай кам къачунва.
— Жува жув кIвалахдалди таъминарзавай касди вичин гьакъиндай гуьгьуьллудаказ кьилиз акъудзавай страхование – им а кас азарлу хьайи дуьшуьшда гьукуматди адан патахъай къайгъударвал авунин, адав пулдин куьмек агакьунин гьакъикъи алат я. Чаз аквазва хьи, ида жува жув кIвалахдалди таъминарзавай касдиз вичин дуллух хуьдай мумкинвал гуда. Чи везифа пул къведай «больничнияр» агакьарунин кIвалах, яни и программада иштиракиз кIандай ксарин регистрация ва абурай пул гун, жезмай кьван регьятди авуникай ибарат я, — къейдна Россиядин Яшайишдин фондунин Дагъустандин отделенидин регьбер Алжанат Загьидовади.
РикIел хкин: жува жув кIвалахдалди таъминарзавай касди гуьгьуьллудаказ страховатунин программада иштиракун патал Яшайишдин фондуна, страховой пулунин кьадар (35 агъзур ва я 50 агъзур) къалуруналди, регистрация авун ва взносар гуз эгечIун лазим я. ИкI, пул гузвай «больничныйдин» ихтияр патал гьар вацра ва я йиса са сеферда взнос гана кIанзава. Ада лагьайтIа, страховой хкянавай кьадардин 3,84 % тешкилзава. Талукь тирвал, вацра 1 344 ва я 1 920 манатдин кьадарда аваз взносар гун лазим къвезва. Йисан взносар са гъилди (яни 12 вацранбур санал) гуз хьайитIа, 16 128 ва я 23 040 манат тешкилзава.
Малуматда мадни хабар гузвайвал, жува жув кIвалахдалди таъминарзавай касдиз, азарлу хьунихъ галаз алакъалу яз, яни «больничныйрай», пул къачудай ихтияр жеда: ада санлай йисан взносар гана 6 варз алатайдалай ва я ара датIана йисан вахтунда взносар гайидалай кьулухъ. Гузвай пулунин кьадар лагьайтIа, стаждилай ва взносар гуз алатнавай вахтунилай аслу жеда. Ам («больничный») къачудай ихтияр хьанвайдакай жува жув кIвалахдалди таъминарзавай касдиз Яшайишдин фондуни хабар гуда.
Гуьгьуьллудаказ страхованидиз талукь программада иштиракун патал «Мой налог» приложенидин ва «Госкъуллугъар» порталдин куьмекдалди, гьакIни республикадин муьштерийрихъ галаз кIвалахдай къуллугъриз фена арза гуз жеда.
Рагнеда Рамалданова
