Ван авуна

ЧIехи СтIал Сулейман хайи йикъан вилик чна ДГУ-дал адан тIвар эхциг хъувун истемиш тавуна тан тийин – гьахълудаказ къарагъарнавай и месэла чи милли газетда. («Ветеранди кхьизва» – «Лезги газет», 14-май, 2026-й.) Гьайиф хьи, ван-сес хкажай касни хьанач, акунач,  вири кисна акъвазна. Гуьгъуьнлай хьиз гьуьрметлу  сиясатчи Х. Къурбанова чун, лезгияр, къерех авун, агъузарун хьизни жезвай хьтин Г. Гьасанован дережа – чка М. Кажлаевав вахкуз кIанзавай амалар вучтинбур я лагьай суални эцигнай («Дуьшуьшдай яни, кьасухдай?» - «Лезги газет», 21-май, 2026-йис). Адазни жаваб гайи касни хьанач.

Лезги халкь дуьзвал, гьахъвал пара кIандайди, стхадизни кваз авайди чинал лугьун тавуна тан тийидай хьизни машгьур тушни кьван? Авайди, гьахълуди чинал вучиз лугьудач кьван?

Ихтилат, месэла анжах СтIал Сулеймананни Готфрид Гьасанован тIварарин, чкайрин гьакъиндай туш. Гуьгъуьнлай адетдин регьберар хьайи А. Данияловазни М. Магьамедоваз абур эбеди ийизвай гуьмбетар эцигнава. Амма  абурулай вилик­ квай, республикадин сад лагьай машгьур регьбер хьайи Н. Самурскийдиз къени гуьмбет авач. Вучиз? Ихьтин «вучизар» – суалар мадни ава.

СтIал Суьлейманакай, адан тIварцIин кьисметдикайни важиблувиликай рахунал хтайтIа, ам неинки лезгийрин, гьакI вири Дагъустандин, амай еке тушир халкьаринни кесерлу, важиблу лишанни дамах тушни кьван?! Яз хьайила, адан тIварцIин къимет агъузар ва я инкар авунин ният авайбур, республикадин сифте вуздал адан тIвар хьайиди, гьа вуздикай ДГУ хьайила, Сулейманан тIвар эхциг хъувунал рази туширбур гьахъсуз жезвачни бес?..

Чна и за къейд авур хьтин гьалариз республикадин цIийи регьбер авайдалай гьахълудаказ, дуьздаказ килигдайдак умуд кутазва.

P.S.  АкьалтIай гьахъсузвал, чун бейкефарун, агъузарун акваз-акваз, кисна акъвазун чи милли хесетрив – намусдив кьазвайди туш. Чун гьамиша жуван гьахълувал, дуьзвал субутиз, намус, дуьзвал, гьахъ хуьз кIандайбурукай, тарихдани гьакI вердишбурукай тушни кьван! Дуьзвал, гьахълувал инсанар, халкьар садзавай шартI-бине тирди рикIелай алудна виже къведач.

Кичибег  Мусаев,

Дагъустандин халкьдин шаир