Игит. Инсаният патал зурба крар ийизвай инсан. Четин вахтара игитриз кичIевал хас туш. Са бязи инсанар игитвал авуниз пешеди мажбурзава: женгчияр, цIукай хуьдайбур, полициядин къуллугъчияр, духтурар ва икI мад. Инсанар хуьн, абур кьиникьикай къутармишун абуруз руьгьдин истемишун я.
Къе чи викIегь ватанэгьлийри дяведин махсус серенжемда чеб халис ватанпересар тирди къалурзава, абуру бубайрин, чIехи бубайрин крар, весияр лайихлудаказ давамарзава. Ватан хуьн, адан хатасузвал таъминарун, ислягь инсанар Украинадин миллетчийрикай къутармишун абуру чпин везифа, буржи яз гьисабзава.
Аскерар, офицерар ва чпин хушуналди фенвайбур викIегьвилелди, гъил-гъиле кьуна, стхаяр хьиз, Донбассдин чилел женгера ава. Гьа женгерикай сада РФ-дин Игит Муслим Муслимовни телеф хьана.
Муслим 1998-йисан августдин вацра дидедиз хьана. Буба – Сайтархуьряй, диде Герейханован хуьряй я. Дагъустандин Огни шегьердин аграрный колледж акьалтIарай, 2019-йисуз армияда къуллугъай офицерди 2022-йисан февралдин вацралай махсус серенжемда иштиракна.
Гьикьван залан хирер хьанатIани, абур сагъ хъхьайла, мад вичин ротадиз хъфена ам. 2023-йисан 1-февралдиз, вичин стха кьейидалай кьулухъ, ам офицерар гьазурдай куьруь курсариз ракъурна, ахпа адаз младший лейтенантвилин чин гана. 2023-йисан 1-майдиз ам къуллугъдин жигьетдай мад хкажна. Адал рота ихтибарна.
Россиядин Игит, са шумуд ордендин, медалдин сагьиб Белиж поселокда кучукнава. Чи рикIера кьегьал хва Муслим Жавидович гьамиша амукьда. Ам намусдин, жуьрэтлувилин дестек тир.
Гьайиф чавай къакъатиз
Муслим хва чи, гьулдандин рикI къеневай,
Тергна душман, гъалибчи къаст рикIевай,
Шарвили хьиз, чи аскеррин кIвенкIвевай…
Гьайиф, гьайиф вун икI чавай къакъатиз.
Пеленгди хьиз кукIварна на душманар,
Катиз хьана абур, къалуз дабанар.
Ватан патал къалурна на гьунарар…
Гьайиф, гьайиф вун икI чавай къакъатиз.
Къалурнач на гьич душманриз усалвал,
Россиядин Игит хьун я кьегьалвал.
Чидачир ваз магълубвални зайифвал…
Гьайиф, гьайиф вун икI чавай къакъатиз.
Телеф хьана лагьай хабар хтайла,
Накъварин сел вилерлай чи атайла,
Дуьнья михьиз шелдин ванцив ацIайла,
Вуч авурай?! Гьайиф вун икI къакъатиз.
Дидеди вун кьиникь патал хайид туш.
Бубади ваз зайиф жер тарс гайид туш.
Амач лугьур Муслим чахъ тIвар хьайид туш…
Жедач ви руьгь са къузни чахъ галачиз.
Лейла Уружбегова,
Россиядин журналистрин cоюздин член
