Кьиблепатан Дагъустандин хуьрера чпин уьмуьр муаллимвилин баркаллу пешедиз бахш­навай, халкьдин арада еке кесер, гьуьрмет авай педагогар тIимил авач. Ахьтинбурукай сад мукьвара вичин 70 йисан юбилей къейдзавай Россиядин образованидин гьуьрметлу къуллугъчи Руслан Владимирович Тагъиев я.

Адан бинеяр СтIал Сулейма­нан райондин Курхуьрелай я. Хайи хуьруьн юкьван мектеб­ акьалтIа­­райдалай кьулухъ Руслан Та­гъи­е­ва армиядин жер­гейра­ къуллугъна. Гуьгъуьнлай ДГУ-дин физикадин факультет акьалтIарна, ам Хасавюрт райондин са мектебда кIвалахал акъвазна. Са кьадар вахт арадай фейила, Р. Та­гъиев СтIал Су­лейманан район­дин образова­нидин управленида методиствилин везифайрив эгечIна, хайи Курхуьруьн мектебда физикадинни информатикадин тарсар гана.

Адан яргъал йисарин гьа­къи­сагъ зегьмет хкянавай пешедиз вафалу хьунин чешне яз къалуриз жеда. Муаллимдин­ пешеди дерин чирвилер, сабурлувал, руьгьдин захавал истемишзава. Муаллимди вичин сухтайриз дуьнья кьатIуз, чпин рехъ жагъуриз куьмекзава. Гьа ихьтин важиблу ва жавабдар кIва­­лахдиз Руслан Владимировича вичин вири уьмуьр бахш­на.

Адан уьмуьрда хизанди кье­тIен чка кьазва. Уьмуьрдин юлдашдихъ галаз санал абуру кьве рушни са гада уьмуьрдин шегьредал акъудна, абуруз образование къачудай мумкинвал гана. Къе гьар сада чпин пешейрай намуслувилелди кIвалахзава.

Чна винидихъ къейд авурвал, и йикъара Руслан муаллимди 70 йисан юбилей къейддайвал я. И лишанлу вакъиа адаз сифте нубатда хизанди, вири мукьва-кьилийри, ярар-дус­­тари мубаракзава. Къуй адахъ сагъвал, хизанда хушбахтвал, яргъал, бахтлу уьмуьр хьурай.

Мубаракрай юбилей ваз,

Багъри ксар къвалав хьурай! 

Руьгь кIубан яз, рикIе даим

Бахтлувилин ялав хьурай!

Чи  мухбир