Чахъ спортда кьакьан кукIушрихъ ялзавай спортсменар ва абурун устадвал хкажзавай тренерар тIимил авач. Магелан Саидович Саидов – акьалтзавай несилдин чIехи къайгъудар, вичелай чешне къачуниз лайихлуди, пешекарвилин кьилин категориядин тренер-муаллим ва высший категориядин муаллим, Дагъустанда путар хкажунин рекьяй (гиревой спорт) спортдин сад лагьай мастер, Россиядин чемпионатдин призёр хьайи сад лагьай дагъустанви – республикада ва адалай къецени машгьур кас.
М. Саидов 1975-йисан октябрдиз Докъузпара райондин Миграгъа дидедиз хьана. Школада, техникумда кIелдайла, адан рикI азаддаказ кьуршахар кьунал ва йогадал алай. Гуьгъуьнлай ам залан атлетикадал ва путарин спортдал машгъул жез эгечIна. Чи ватанэгьлиди Белгороддин госуниверситетдин физкультурадин ва спортдин факультет акьалтIарна. Ам яргъал йисара Губкин шегьерда яшамиш хьана. 2003-йисуз адал путарин спортдай жегьилрин секциядиз регьбервал гун ихтибарна. Имни лишанлу кам хьана, чи ватанэгьлидин бажарагъди тамамдаказ вичикай хабар гана. Адалай кIелунинни тренировкайрин кIвалах гьам жаванриз, гьамни вичиз гзаф итижлу жедайвал эцигиз алакьзавай. Адан гъилик вердишвилер къачузвай, путарин спортдин сирерай кьил акъудзавай спортсменрин гьунарар тарифдайбур хьана. Абуру дуьньядин ва Европадин чемпионатра, международный, Вирироссиядин, регионрин арада кьиле фейи турниррани акъажунра къазанмишзавай гъалибвилер фикирда кьуналди, 2011-2013-йисара чи ватанэгьли путарин спортдай Белгороддин областда виридалайни хъсан тренер яз гьисабна. Гьа са вахтунда спортдин майданра Магелан Саидовича вичини устадвал къалурзавай. Ада Белгороддин областдин чемпионвилин тIвар 9 сеферда къазанмишна. Ам гьакIни хейлин турниррин ва акъажунрин гъалибчи я. КьетIендаказ мадни а кар къейд ийиз кIанзава хьи, Магелан Саидовича спортдин международный классдин кьве мастер, Россиядин спортдин 9 мастер, Россиядин спортдин мастервиле 18 кандидат, жуьреба-жуьре разрядрин 80 спортсмен гьазурна.
Дагъустандиз хтайла, М. Саидова вичин вири къуватар чи республикада спортдин и жуьре машгьур авунихъ, ам вилик тухунихъ элкъуьрна. Адан чалишмишвилер себеб яз, 2017-йисуз Дагъустанда путарин спортдин федерация арадал гъана. Ам и федерациядин регьбер ва республикадин хкянавай командадин кьилин тренер я, гьакIни адалай гъейри Кеферпатан Кавказда путарин спортдай Вирироссиядин категориядин спортдин судья авач.
Къейд авун лазим я хьи, адан регьбервилик кваз 2018-йисуз путарин спортдай Дагъустандин сад лагьай чемпионат кьиле тухвана. «Миграгъ» тIвар алаз тешкилзавай республикадин фестиваль Кеферпатан Кавказда авай сад я.
Чна Магелан Саидовичахъ, адан гъилик вердишвилер къачузвайбурухъ, гьакIни чи гьар са ватанэгьлидихъ мадни чIехи агалкьунар хьун алхишзава.
Рагнеда Рамалданова
