Веревирд авурла, уьмуьрда инсандиз рехъ къалурдай, меслят, куьмек гудай, жуван сир ачухиз жедай багъри инсан хьиз я газет; адан чIал — тадарак, сифте нубатда — рахунрин, ахпа кхьинрин.
Кхьинрин чIални инсанар патал тирвиляй ада арадиз гъидай чар — газет- журнал — ктабни гьа инсан вич хьиз я. Абурун куьмекдалди рахада, масадаз чешне къалурда, теклиф гуда, хъсандини писди, гьахълудини батIулди вилик гъида, хийир-зиян аннамишиз, веревирд ийиз, менфятлуди хкягъиз чирда.
“Лезги газет” чи руьгьдиз ем я. Де туштIа, куьн килиг. Зи вилик чи газетдин алай йисан 29-нумра ква. Ам 1957-йисуз “Ахцегь-Мискискар” къанал ракьун турбайра тунвай 54 ва 42 метр алай араяр цIийибуралди эвез хъувунин шад хабардилай ва, гатун йикъан пакама хьиз, республикадин кьилин везифаяр вахтуналди тамамарзавай Владимир Васильева вичин кIвалахдин гьахъ-гьисаб хьиз кьиле тухвай, “Чи къаст къайда тун я…” лагьай совещанидикай хабар гуналди ачух жезва. Ана лугьузва: “Чна Дагъустандин халкьдив Центрадай рекье твазвай ва чкадал аялар, дишегьлияр, яшлубур патал кIватIзавай такьатар абурув агакьардай гьалар арадал гъана кIанда”… Макъалада гьакI РД-дин Кьили вичи Владимир Путиназ чи мулкунал гимияр ремонтдай завод ва военный училище ачухунин мумкинвилериз килигун теклифнавайдакай, гьакIни “Россети” ПАО-ди кьиле тухузвай ученийрихъ галаз алакъалу тир са месэладай республикада харжзавай электроэнергиядин 50 процентдилай гзаф ишлемишзавай 6 муниципалитетда электроэнергия ишлемишунин кIвалахда ерилувал ва хатасузвал аваз къайда тун вичин хивез къачунвайдакай малумарнава.
Совещанидал мад Дагъустанда гатун вахтунда аялар сагъламардай кампания кьиле тухунин месэладизни килигайдини къейднава. Мадни газетдин гьа и чина вири обществодиз, шаир Майрудинан юбилейдиз, гьар садан уьмуьрдиз ва сагъламвилиз талукь хабарар, меслятар гьи чинра ганватIа къалурнава.
Газетдин 2-чина чи республикада 10 йисалайни гзаф вахтунда чпин эцигунар куьтягь тийиз хьайи 7 школадинни са спортзалдин гьалар веревирднава. Абурун арада 100 аялди кIелдай, вичихъ спортзални галай школа Кьурагьа ва 440 аялди кIелдай школа Сулейман-Стальский районда сентябрдиз ишлемишиз вахкудайдакай, Лезгийрин федеральный милли культурадин автономиядин (ФЛНКА) регьбер Ариф Пашаевич Керимова чи уьлкведа лезги чIалан дестедик акатзавай халкьарин милли культурадин ихтиярар хуьнин карда тухузвай общественный кIвалахриз Президент Владимир Путинани виниз тир къимет гуникай макъала ва Бакуда акъудзавай лезгийрин культурадин журналдин тIвар “Алам” вичел къачуна, гьа са вахтунда автордиз вичизни вичикай хабар авачир тегьерда “Добрый лезгин” макъалада а журналдин редакциядал хъен вегьезвай “кьегьалдикай” Мерд Али Жалилован “Руьгь тахьайла?..” кутугай макъала ганва.
Гьакъикъатдани, “лезги чIалалди” кхьенвай а макъалада чал гилалди чпикай миллиондилай виниз лезгийриз хабар авачир цIийи “къагьриманрин” (Виро, Урнайр), гьакIни мусурман динда авачир пайгъамбар Забит Ризванован тIварарни гьалтзава. “Чи Кавказ Албаниядин кхьинар винел акъуд хъувунвай Ярали муаллим кьацIуриз алахъзава” ва маса ихьтин я бегьем адрес, я бегьем делил авачир материалар чап авуни неинки автор, адаз чка гузвай журнал, гьакIни а журнал чапзавай чIал жагъай миллетни кваз абурдай вегьезва… Спортсмен Бахтияра вичиз лезги лугьунал (ам лезги хьунал) шадвалзавай авторди чеб лезги тирди хиве кьазвачир цIийи несил арадиз атунални шадвалзава. Аламатдин фикир я(!).
Гьуьрметлу “Алам”, бегенмиш ятIа, рахух а чIалал, чап ая жуван журнални… Са карди чун суаллу ийизва: вучиз вуна къе чи (миллетдин) арадиз — чIалаз — нефесдиз — фаз хаинвалзава?
Абдулашим Гьажимурадов
