17-сентябрдиз Дагъустандин Кьил Сергей Меликова республикада баскетбол вилик тухуниз талукьарнавай совещание кьиле тухвана. Анал и жигьетдай тайин камар ва серенжемар, гьа гьисабдай яз инфраструктура хъсанарунин: спортдин майданар эцигун ва авайбур цIийи хъувун, абур лазим тадаракралди таъминарун ва икI мад веревирдна. Идакай «Лезги газетдиз» РД-дин Кьилин ва Гьукуматдин Администрациядин пресс-къуллугъди хабар гана.
Баскетболдивай ва волейболдивай, Дагъустандин Кьили къейд авурвал, вири дуьньяда машгьур спортдин кьве жуьредивай, дагъустанви гадаяр хьиз, рушарни желб ийиз жеда. Спортдин и жуьре машгьурунин месэладикай рахадайла, С. Меликова футбол чешне яз къалурна.
— 2022-йисуз футбол вилик тухунин месэлайрал машгъул жез башламишайла, чахъ затIни авачир. Амма чими гьавади неинки физкультурадинни сагъламвал мягькемардай чIехи комплексар, гьакI куьчедал спортдал машгъул жедай майданар арадал гъидай мумкинвални гузва. Ида чаз екез куьмекзава. Идалайни гъейри, цIийи школаяр эцигдайла, анра чIехи кьве спортзал, абурукай сад спортдин къугъунрин жуьреяр патал хьун шартI я. Абур международный стандартар фикирда кьуналди эцигзава, — къейдна ада.
Тема давамарун яз, Сергей Меликова футболдин школадин лигадин (ШФЛ)агалкьунрикайни лагьана. Чи регионда ам тешкилна анжах 2 йис я. Жегьил футболистри неинки Вирироссиядин акъажунра иштиракзавайди, гьакIни абура гъалибвилер къазанмишзавайди къейдна, и мукьвара Махачкъаладин 5-нумрадин лицейдин футболистрин командади «Тумаждин туп» ШФЛ-да гъалибвал къазанмишайди рикIел хкана.
Регионда баскетбол вилик тухунин месэла веревирддайла, Дагъустандин Кьили школайрин ва вузрин программадик кутун патал «Школада баскетбол» (массовый футбол вилик тухуниндаз ухшар аваз) махсус программа арадал гъун, и кар кьилиз акъуддайла образованидин чIехи объектрин, спортдин майданрин мумкинвилер фикирда кьун теклифна.
Дагъустандин баскетболдин федерациядин председатель Максим Келебеева и къугъун неинки спортдин жуьре, гьакI массовый культурадин важиблу пай тирди къейдна. Ам йигин еришдалди вилик физвайди, уьлкведани адал машгъул жезвайбурун кьадар артух жезвайди раижна.
— Дагъустан амай регионрилай кьулухъ галамукьна виже къведач. Чна республикада спортдин и жуьре вилик тухун патал программа арадал гъанва. Гьелбетда, са жерге месэлаяр гьялна кIанзава, абурун чIехи пай инфраструктурадиз талукьбур я. Чахъ гьелелиг лазим кьадар майданар авач. Амма са кьадар агалкьунар хьанва, — лагьана ада.
М. Келебееван гафарай мадни малум хьайивал, эхиримжи йисуз тухун пландик квайбурал алава яз, 20-дав агакьна акъажунар тешкилнава, Дагъустанда баскетболдай пешекарвилин академия ачухнава. Акъажунра 2 агъзурдалай виниз ксари иштиракзава. Баскетбол аялрин сагъламвал мягькемарунал машгъулбурун арадани машгьур я. Гьа са вахтунда гзаф аялриз спортдин и жуьредал машгъул жедай мумкинвал авайди чизвач. Гьаниз килигна, регионда баскетбол вилик тухунин программада сифте нубатда аялрин бахчайриз ва умуми образованидин идарайриз артух фикир гун къалурнава. М. Келебеев кьилди СДЮСШОР-рикайни рахана. Абурун везифадик Дагъустандай тир спортсменри гележегда Вирироссиядин ва международный акъажунра иштиракун патал пешекар баскетболистар гьазурун акатзава. Мукьвал гележегдин планрик гьар йисуз студентрин арада баскетболдай лига тешкилун, вузрин командаяр арадал гъун, пешекар-баскетболистрин хъсан команда арадал гъун ва икI мад ква.
Совещанидал физкультурадинни спортдин «ДаКИ» клубдин тренер Агьмед Гьамзатова куьмек гунай, гьакI гьаждал фидай мумкинвал хьунай Сергей Меликоваз сагърай лагьана, Вирироссиядин турнирда къазанмишай гъалибвал Сергей Меликоваз бахшнавайди къейдна. РикIел хкин: июлдиз региондин Кьил баскетболистрихъ-колясочникрихъ галаз гуьруьшмиш хьанай. А чIавуз клуб ва санлай баскетбол вилик тухуниз талукь са жерге месэлаяр къарагъарнавай. Алатнавай са куьруь вахтунда абурукай са кьадарбур гьялиз алакьнава.
Совещанидал республикадин баскетболдин инфраструктурадиз ва спортдин комплексар эцигунин тежрибадиз талукь месэлайрикай РД-дин физический культурадин ва спортдин рекьяй министр Сажид Сажидова лагьана.
Эхирдай Сергей Меликова талукь программа галай-галайвал тайинарунин тапшуругъ гана ва спортдин къугъунрин жуьреяр вилик тухун уьлкведин Президентди Федеральный Собранидиз рекье тур вичин Чарчени къейднавайди рикIел хкана.
Рагнеда Рамалданова
