18-20-январдин йикъара Махачкъалада «Труд» стадиондал 2009-2010-йисара дидедиз хьайи рушарин арада волейболдай кIвенкIвечивал патал финалдин къугъунар кьиле фена. Республикада лап гужлу 8 командадин арада къизгъин хьайи акъажунра ахцегьви жегьил рушарин командади 3-чка кьуна. 1 ва 2-чкайриз Каспийск ва Махачкъала шегьеррин командаяр лайихлу хьана. Им республикадин районрин арада Ахцегьрин рушарин команда 1-чкадал ала лагьай чIал я.
Командадин кьилин тренер, высший категориядин муаллим, физкультурадинни спортдин рекьяй РД-дин лайихлу къуллугъчи Нурамет МутIалибова къейд авурвал (куьмекчи тренер — Казбек Парпачев), ихьтин агалкьунар Ахцегьрин рушарин командадиз са шумудра виликрайни хьайиди я. Гила Ахцегьа тарифлу спорткомплекс кардик акатуникди аялриз ва жегьилриз спортдал рикIивай машгъул жедай вири шартIар таъмин тирла, гьелбетда, агалкьунарни артух жеда.
Командадик квай: Ильясова Рукъуят (капитан), Алагьярова Фатима, Зугьрабова Эльвира, Мегьамедалиева Карина, Мегьамедова Амина, Мустафаева Сабина, Парпачева Амина, Абдулкеримова Амина, Фетуллаева Фатима, Эфендиева Кларина.
Дашдемир Шерифалиев
