Макъаладиз заз «Аслан хьтин хва» кьил гузни кIанзавай. Аллагьдик умуд кваз, и кар за, адахъ мадни чIехи дережаяр хьайила, кьилиз акъудда. Вичин гъвечIи яшаризни килиг тавуна, самбодал рикIивай машгъул жезвай, машгьур спортсмен хьун патал гъвечIи чIавалай зегьмет чIугун лазим тирди аннамишзавай Аслан Тагъиева вичин вахт гьавайда пучзавач. Аквазвайвал, агалкьунрини чеб яргъалди гуьзетиз тазвач…
Ингье и йикъара самбодай Москвадин ва областдин аялринни жаванрин Лигада кIвенкIвечивал патал акъажунра ада инанмишвилелди 1-чка кьуна. И агалкьунал къведалди, ада хкядай 8 турда гъалибвилер къазанмишна. Суперфиналда ада вичин устадвал вири гьейран жедай тегьерда вини дережада аваз къалурна.
Асланан ери-бинеяр КцIар райондин лезгийрин Цуру Худат хуьряй я. Ам 2018-йисуз Каспийскда дидедиз хьана. Алай вахтунда ам вичин хизандихъ галаз Красногорск шегьерда яшамиш жезва, тренер Вячеслав Бусыгинан гъилик вердишвилер къачузва. Аслана Красногорскдин Кубок кьве сеферда къазанмишнава. Ам гьакI маса турниррин ва акъажунрин гъалибчини я.
Чун кIевелай инанмиш тирвал, рикI алаз эгечIзавай гьар са кардихъ хъсан нетижаяр, чIехи агалкьунар жеда. Аслана, ам хьтин кьегьал маса гадайри дуьньядин кесерлу майданра чпикай хабар гуда.
Рагнеда Рамалданова
