Чи машгьур ватанэгьли, Грециядин патай экъечIзавай Даурен Куругълиева алай йисуз Францияда кьиле фидай Олимпиададин къугъунра иштиракда. Ихьтин мумкинвал адаз 11 ва 12-майдиз Туьркиядин Стамбул шегьерда кьиле фейи Виридуьньядин турнирда гъалибвал къазанмишуни гана.
Д. Куругълиеваз финалда Украинадай тир Василий Михайлов 3:0 гьисабдалди кумукьна. Вири санлай ада и турнирда 4 бягьс кьиле тухвана, абур 16:0 гьисабдалди акьалтIна. Чна Даурен Олимпиададайни гъалиб хьана хтуник кIевелай умуд кутунва.
***
Са шумуд югъ идалай вилик Москвадин областдин Сколково поселокда азаддаказ кьуршахар кьунай Россиядин чемпионат акьалтIна. Ана Москвадин патай экъечIзавай Шамиль Мамедова 65 кг-дин заланвал авайбурун арада къизилдин медаль къазанмишна. Тренер М. Къазиеван гъилик вичин устадвал хкажзавай чи ватанэгьли гила Россиядин чемпионвилин тIварцIиз 2-сеферда лайихлу хьанва!
Аферин!
***
И йикъара Махачкъалада, «Труд» стадиондал, «Кавказдин къугъунар» лишандик кваз, Олимпиададин чемпион Гь. Гьайдарбегован призар патал, гьакIни Россиядин лайихлу тренер М. Мегьамедован экуь къаматдиз бахшна, спортдин милли жуьрейрай жаванрин арада республикадин фестиваль кьиле фена. Ана республикадин шегьеррай ва районрай тир 16 командадик кваз 200-далай виниз жаванри иштиракна.
Виликан йисара хьиз, цIини фестивалдин программадик 100 ва 800 метрдиз чукурун, гиря гадарун, цIил ялун, кьезил атлетикадай эстафета ва масабур квай.
Фестивалда Кьурагь райондин командадини иштиракна. Гиря гадарунай Кьурагьрин 1-нумрадин СОШ-дин 11-классда кIелзавай Мурад Хийирбегова 2-чка кьуна.
***
И мукьвара Махачкъалада жаванрин арада боксдай кьиле фейи турнирдани республикадин шегьеррайни районрай тир гъвечIи спортсменри чпин устадвал къалурна. Абурун арада СтIал Сулейманан райондин КIварчагърин хуьряй тир Самир Жамалдиновни авай. Тренер Альберт Межидован гъилик вердишвилер къачузвай жаванди 36 кг-дин заланвал авайбурун арада 1-чка кьуна. Чна адаз къазанмишнавай сифтегьан гъалибвал тебрикзава, адахъ гележегда зурба агалкьунар хьун алхишзава.
Рагнеда Рамалданова
