Винидихъ тIвар кьунвай чешмедин делилрал асаслу яз, алай йисан алатнавай варцара Дагъустанда инвалид аялрихъ гелкъуьнин алава отпускдин йикъарай 23 миллиондилай виниз пул рекье тунва. Къейд авун лазим я хьи, алава отпускдин гьар са югъ кIвалахзавай касдин юкьван мажибдал асаслу яз гьисабна гузва.
РикIел хкин, инвалид аялдихъ гелкъвезвай дидедиз ва я бубадиз, гьакIни опекундиз ва я къаюмвалзавайдаз (эгер кьведани кIвалахиз хьайитIа) гьар вацра алава отпуск яз 4 югъ гузва ва абурай пул чара ийизва. Гьа икI, аялдин дидедизни бубадиз, санлай къачурла, йиса 48 югъ алава отпуск гузва.
Малуматда мадни гъавурда твазвайвал, и йикъар гьар вацра ва я кIватIна са сеферда, санал 24 йикъав агакьна къачуз жезва, амайбур — гьар вацра), амма и дуьшуьшда графикдин патахъай работодателдихъ галаз меслят авун герек я.
— Ихьтин куьмек адалди къиметлу я хьи, ада уьмуьрдин жуьреба-жуьре гьалар фикирда кьазва. Мисал яз, инвалид аялдин дидеди кIвалахзавач ва я декретда ава, бубадиз отпускдин алава йикъар къачудай ихтияр ава. Эгер дидени буба кьведни кIвалахдик кватIа, абурувай и йикъар чпиз кIандайвал кьве патал пайиз жезва. Кьилинди работодателдиз арза гун я, Яшайишдин фондунин отделениди и такьатар работодателдив эвездай вахкузва, — къейдзава СФР-дин Дагъустанда авай отделенидин управляющийдин везифаяр тамамарзавай Алжанат Загьидовади.
Ада мадни гъавурда твазвайвал, диде-бубадикай сад кIвалахдал хьунилай аслу тушиз, кIвалахзавайдаз алава отпускдин пул гузвай йикъар къачудай ихтияр ава. Арза работодателдиз гузва, пулдин такьатар, винидихъни къейднавайвал, Россиядин Яшайишдин фондуни рекье твазва.
Эгер и ва маса месэладиз талукь яз суалар аматIа, абур квевай, Россиядин Яшайишдин фондунин сад тир алакъадин центрадиз зенгна (телефон: 8 (800) 100-00-01), жавабар жагъуриз жеда. Зенг пулсузди я.
Рагнеда Рамалданова
