Гьар йисуз Ахцегьа кьиле физвай лезги халкьдин къагьриманвилин «Шарвили» эпосдин сувар Дагъустандин халкьарин сувариз элкъвенва. Цlи 19-сеферда яз кьиле тухвана. Иллаки Кьиблепатан Дагъустандин районри гурлудаказ иштиракзава.

Адет тирвал, гьар са районди Ахцегьрин кьилин куьчейра и юкъуз кьилдин шад майданар тешкилзава, жуьреба-жуьре экспонатар къалурзава, мили макьамарни манияр тамамарзава, суфраяр къурмишзава… Кьилди къачуртlа, Ахцегь, Докъузпара, Сулейман-Стальский, Хив, Кьурагь, Агъул, Табасаран, Дахадаевский районри, Дербент шегьерди, Лезги театрдин коллективди кьилдин майданар туькlуьрнавай.

Лап чими, зегьем югъ тиртlани, иштиракзавай инсанрин кьадар гзаф тир.

Суварин сергьятра аваз спортдин са шумуд жуьредай акъажунарни кьиле фена. Са гафуналди, «Шарвили» эпосдин сувар фикир желбдай жуьреба-жуьре вакъиайрив ацlанвай.

Майданрал концертар гайидалай кьулухъ вири мугьманар Валентин Эмирован тlварунихъ галай паркуна кlватl хьана. Чlехи концерт эгечlдалди «Шарвили» суварин тешкилатчи Имам Яралиева,  вири мугьманриз сувар мубаракна, РД-дин Гьукуматдин Председателдин Сад лагьай заместитель Анатолий Къарибова ва масабуру вири мугьманриз сувар мубаракна.

Суварин сергьятра аваз гьар йисуз Имам Яралиева «Шарвили» премияр вахкузва. Цlинин йисуз и премиядин сагьибар чпи милли медениятдик, журналистикадик, спортдик чlехи пай кутур векилар тир шаир, гзаф йисара «Дагъустандин дишегьли» журналдин редактор хьайи Пакизат Фатуллаева, «Дагъустан» ГТРК-дин радиодин лезги редакциядин кьилин редактор Наира Рамазанова, «Дагъустан» ГТРК-дин лезги редакциядин редактор Нарима Жамалова, Дагъустандин халкьдин писатель, «Самур» журналдин редактор Абдуселим Исмаилов, машгьур журналист Абдулафис Исмаилов, шаир Эйваз Гуьлалиев, спортсмен Тельман Къурбанов хьана.

«Лезги газет»